الدنيا صيف والواطة حر والخُلق ضايق.. يا كافي البلا الموية تدخل الريق تسمع (تش).. والعرق صابي، وأنا في نص الخلايق متشعبط في لوري طوب جاي من حلة كوكو.. يد في التندة ويد ماسك بيها (البتيخة) العزلتها عزل (على السكين) نزلت من اللوري مكتح (زي الجاي من دافنه) شافني شافع الجيران قال لي: أنت شغلك شنو؟! (بتبيع فول حاجات ولا شنو؟) مالك مكتح ومغبر كدا؟!.. ابتسمت بسمة خفيفة كدا وأبيت أضحك من شدة خشمي ما ناشف خفتو ما ينقفل تاني.. وأنا ماشي على بيتي وأتحكحك في الحيط (كايس الضُل).. مريت بحيطة عم أحمد الممرض وفجأة سمعت ليك جنس نضمي وكواريك.. عم أحمد كان يكورك في مرتو.. النصيحة (الشمار كتلني) ووقفت أسمع شوية.. لقيتو ليك بيقول: أنت قايله روحك مرا مع النسوان (تشبهي شايب الكشتينة يالشينة يالقبيحة يالبتشبهي روحك).. أول مرة أشوف لي مرا (مشلخة بالطول والعرض التقول شلخك ترزي!).. علي أمان الله خلقتك دي ما شفتها إلا في (غفير الإستبالية).. يا النحس.. إنت ما تحمدي الله أنو لقيتي زول يقابلك كل يوم، يقابلك قطر نيالا إن شاء الله، إنت بدوري تقصِّري عمري بي شكيتك ونجهيك دا.. أنا أسوي شنو أسرق ولا أنهب عشان أكفي برميلك الشايلاه دا؟!.. في بت بيوت بتاكل ليها 30 عيشة في اليوم؟؟ والله إنت الأكل البتاكليهو دا أكان أنا إتبرعت بيو لي (زاد المجاهد) كان أكون من (العشرة المبشرين بالجنة؟!) وإنت برضو بتشكي!! إنت فصيلتك شنو إنت(مرفعين؟!) وفي الآخر تجي تقولي لي دايرة (سلسل دهب؟!).. هو رقبتك دي بنفع معاها سلسل دي دايرة ليها (درابزين داير ما يدور!!).. وكمان بتتشرَّطي وتقولي لي إن ماجبتو (أطلقك؟!)..
