ال C.I.A في السديرة

الاخ ود الشيخ لك التحية والشكر
يازول بقيت زى المسطول القراء الجرايد بعد ثمانية اعوام وهو فى اواخر التسعينات وبكى لما علم ان السادات مات ياخى الموضوع كله اصبح تاريخ والحكومة تشكلت والمناصب وزعت والحقائب الوزارية سلمت والمهام كلها انتهت والفترة الانتقالية اوشكت ان تنقضى والوحدة مابين شمال القرية وجنوبها اصبح فى مسالة وضع اللمسات الاخيرة وانا خايفك تسالنا ياربى عبود فى الحكومة ولا شالوه وممكن نتوقع ان يكون سؤالك ياربى الانجليز فى البلد ولا طلعوا ده اكان ماسالتنا عن غردون باشا وصرايته وعاى العموم لما تصح من النوم وتتلمس الحقائق ستجد ان من تطلب له حق اللجوء السياسي الان هو فى قلب الاحداث مستشارا لشئون الهجرة ولك شكرى وتقديرى ونتمنى ان تتابع الاحداث

محمد قسم السيد حمد

اخي ود قسم السيد , والله فعلاً الحكاية تغيرت لكن ما بسبب ما ذهبت انت إليه ولكنالقصة في غاية الخطورة , فقد زارني جدودنا زمان في المنام , زارني جدي ود البي وجدي ود الدرويش وجدي حاج بابكير وجدي حاج ابراهيم ود امحمد سعيد كلهم لكزوني بي عصيهم وحسيت بي رعب شديد , حاج بابكير شايليه إبريق كباهو فوق راسي شفت حاج ويس جاي علينا وجاري حسبو بي يد ويصقِّع فيه بالسبحة بالإيد التانية وحسبو يصرخ بي طول حسو : جدي توبة توبة يا حبوبة , بس وقفونا ليك الإتنين مع بعض , قالو لينا كمان بتدورو تجيبو لينا امريكا في البلد ,بتدورو تبقو زي بتاعين العراق الخيبانين ديل والله خبر! حسبو قعد ينكر وقال انا كنت بهزر ساي , بس جدي ويس صاج لصق ليه كف , انا سكت ساي ,قلت اصلو ما اتكلم اخدت لبيعاتي وسكت , قام جدي الدرويش لكزني قال لي شايف الجماعة ديلك , عاينت وقلت ليهو لا لا ما عرفتهم , لكن الجماعة كانو مكان ودشنين , قال لي ديل ناس جدك البي وجدك النزل وباقي أهلك القدام ( أول حاجة أنا قايلم ديل ناس صقر قريش وجماعتو ) قال لي والله ما تقولو تبنا أكان اسع نرميكم ليهم , زعلانين منكم بالحيل , بس أعلنا توبتنا , وشفت ليك حسبو دنقر في الواطة وملى خشمو تراب وقال ليهم أهه ان سافي التراب , قالو لينا هي نان الخلاكم تسوو كدي شنو؟ حسبو طبعا بتاع سياسة وفلسفة قام قال ليهم والله يا جدودي كانت المسألة فيها مساومات سياسية , بس قبال يتم كلامو ادوه ليك تنهرات قام سكت , انا ضحكت قامو ادوني ليك نهرة ست سكت . من ديك وعيك انا تبت توبة نصوحة وما ح اساوم فوق بلدي ولا ابيع حفنة من قمامتها بأعلى منصب في أمريكا . نسأل الله يغفر لنا ذنوبنا وإسرافنا في أمرنا .

الاخ حسبو انت عارف انا لما قريت الموضوع اندهشت وزعلت بعدين انا ماحاسدك علي وضعك الجديد مابرضو ود عمي اقل حاجة ممكن القاها وزير دفاع لكن المحيرني انو انا اتعرضت لنفس الاغراءات دي بينما انا امدد بدني المنهك بعد يوم عمل شاق ترن ترن ترن اعاين في الجوال الرقم مفتاح امريكيا لاول مرة ضغطت علي زر المحادثة عربي مكسر كده الو معاك كوندا اللهم اجعله خير كوندا منو ( شنو ياني ماعرفت سوتي ) والله والله الصوت ده ماغريب علي
-كوندا ليزا رايس يا حسامة ( اقشعر بدني وتصببت عرقا ) وبسرعة جريت شريط طويل من قبل الجامعة لبعد الجامعة لهسه هل اشتركت في الحرب الدائرة الان في دارفور هلي مرقت مني كلمة جاي والله جاي لا سمح الله-حتي انا الامم المتحدة البمر فيها يوميا ماقاعد اتلفت عليها – وتلعثمت وبلعت ريقي كم مرة _الو حسامة مافي خاجة انت مهظوظ اننا وقع الاختيار عليك لرياسة بتاع ولاية واحد وكمسين سديرات - يا جماعة الزولة بي صحها – يا كوندا كدي وقعي لي الكلام دة انا مافاهم خاجة – انا ارفة انو موضوع ده انت ما مصدق لكن انت اول واحد اخترناه – بعدين نحنا حانوحد سديرات نخليه سديرة واحدة –طبعا انا هنا قاطعتها هوي ياكوندا نحنا متوحدين وبعدين نحنا اهل – اوه او ه حسامة انا شايف انت زعلان كتير نحنا عارفين تبعا انت عائلة واحدة اسيلات لكن نحنا اول نفرقكم بعدين نوحدكم – كوندا ارجوك
-كدي خلينا في مهم – حسامة انا برسل ليك تفاصيل في ايميل بتاعك – فور مور ديتيلس - انت جبت ايميلي من وين –نو حسامة انحنا عارفين –كتير – بعدين مندوب بتاعنا حا يقابلك في قهوة كشب بكرة ات ثري اوكلك –كمان بتعرفوا قهوة الخشب –اوه كتير –ابو زومام –ابو شامة – هاج سعد – وعارفين انو في مهمشين كتيييييييييييير وجرائم هرب ضد الانسانية – في اللحظة دي انا الجوال وقع مني -وفي نفسي كده قلت المرة دي حاتورطني – بعدين شيخ احمد ده انا بعزو وماممكن نخونو ونقبل برياسة امريكا والشرقية دي كلها اهلي- بكرة مما انا اقبل بالكلام ده ذي مانت خايف ياحسبو –تجي قوات طبعا انحنا عارفين انو عندنا ثروات – وبعدين يعملو جدار فاصل بين الشرقية والغربية – قوات لحفظ السلام في مديدك –جنينة ود المختار قاعدة جوية حربية – طبعا عرض السفارة الاسرائلي انا رفضوا رفضا بات وقولت ليها الا دي ياكوندا الا دي – قامت اتكلمت مع واحد كده لكن انا لقطت لي كلمتين انجليزي وقال ليها يعلق طبعا الصوت ده جايني من بعيد –لكن انا ما عرفت يعلق منو انا والله الموضوع- المهم كوندا قطعت الاتصال وقالت لي بكرة موعدكم قهوة الكشب –وكلمة السر للعميل الامريكي –دبسية –يعني لما تلاقية انت تقول دبيسة – العبد لله صباحاتو دقش قمت علي صينية المركزي – وانا الليل كلو امني نفسي بالرياسة الامريكة علي المقاطعة الجديدة او الولاية الامريكية الجديدة اول هايس اتخذت فيه موقع ركاني كده – لقيت واحد خاتي كيس -قالي المقعد ده محجوز المهم كلمة منو كلمة مني كلمة من الركاب –السواق - قلت ليه في سري انت ماعارف حاجة –انا الرئيس المرتقب – بكرة حاتيجني عايز ليك قرين كارد لانك ما حتملك حق المواطنة الامريكية للمقاطعة الجديدة- المهم وصلت قهوة الخشب –لقيت عربية جيب واقفة وخواجة ماسك ليه سنارة –فوق ضهر الكنار اقتربت منو بتوجس كده –قلته دبيسة – الخواجة قام علي حيله –اوكيييي-
هاي كوندا كلمتني عليك كتييير هسامة ووصفتك انك كتيييييير متعاون انتم عندكم مستقبل كبييييييييير –يا خواجة ادينا ما عندك وقول باختصار –اهه- ويت امنت- هسامة –المهم مشينا علي راكوبة كده - من الرواكيب الجنب البنشر – وقعدنا قلت للحاجة كبي للخواجة ده والمعاهو اثنين شاي – اوكي هسامة فري شقر يو ار جنيرس –رديت عليه قلت ليه يو ار ماي قست- اها قال نبداء الاجتماع اول حاجة رقم حسابك كم –نحنا حانضع ليك اثنين مليون دولار في حسابك- 2 مليون دوررار –طبعا انا مابعرف انطقها لاني انا بتاع مليون جنيه فاقل – المهم غايتو الحكاية خلتني مشدوه وقلته الناس ديل من البداية دفعوا لي 2 مليون دوررار بعدين حايدوني كم –الخواجات ديل راقدين فوق راي – اه ا خواجة وخلافه – نحنا حا نعمل ليكم شارع الزلط ولازم يمر بالسديرات نحنا عارفين انو في خلافات لكن نو بربلم –كل خاجة مرتبة - وحانعمر ام فطير ونعمل فيها مدارس وميادين ومستشفيات وهوتيل وحاتكون منطقة سياحية تابعة للمقاطعة –وحانرجع ليكم المجلس من السناعات – اوووو- ياخواجة حرم اكان تكبي ليهم قهوة كبي وماتعدي – الجماعة ديل ماشين معاي كويس –بعدين انحنا عايزنك تكون فلكسبل –عشان مصالح مشتركة – ومسالة سفارة اسرائيلية دي لازم توافق بعدين عليه عشان في كلام كتير لازم نتفاكر عليه – وانت لازم تزور اسرائيل ذي سادات زمن بتاع بيجن – طبعا في اللحظة مرت علي كل صور القتلي الفلسطينين والارامل والاطفال والعجزة – بس اقوم ليك علي حيلي وعيوني حمرت- هوي ياخواجة هوي فتح عينك ذي الريال علي الطلاق انا لا بعرف خواجة لا بعرف؟ عامل خلقتك الزي الديك الرومي –حرم سفارة مااقبل بيها وما تقول لي مصالح مشتركة انا عارف بلدي غنية وحرم ود عكر بس نشبع ما تغريني بالمال المال بيجي ويروح لكن الدايروا مابتلقي – المرة البتسو في الشاي في الراكوبة ذغرتت ايوي يووووووي قبلت عليها قولته ليها ابشري- الخواجة طبعا فاتح خشمه مشدوه من كلامي – ويسوي لي بي كوايت بي كالم وانا هايج وعيوني محمرة المهم الزول المعاه كلمني بلهجة عربية واضحة وهداني شوية وقال لي اقعد عرفتو ده عميل عربي وقال لي متل مابدك نسوي
طبعا ماشتغلت بيه –وقبلت علي الخواجة مرة تاني –انا مقدرات بلدي بعرفي كان زراعة كان بترول اكان صناعة وحرم هسع انا عندي عشرة مصانع اسمنت قريب افتتاحها – وحرم البشير ده تشمو قدحة يقدل في السوق ماتهبشو –الاخ العربي قاعد اترجم ليه – لكن سامع الخواجة قال ليه وات ذا ميينق اوف قدهة – العربي جاي جاي مشاه –الخواجة قال اوه هسامة انت كده في مشكلة كبييير عشان كده نحنا لازم تكيير اوف يو – نحنا لازم نعمل جدار عازل بين شرقية وغربية –وعقوبات اقتصادية كتييير وطريق مايمر بي سديرات – قلته ليه الغربية والشرقية وحده قوية مابتقدر تفرقها وهم اهل حارة واحدة واهل كرم وشجاعة–
ونميت
نحنا اولاد عسيل والزهرة حبوبتنا يوم دق النحاس ياهو يوم حوبتنا
المترجم غلبتو الكلمات دي شغل ليه المترجم الالي
الخواجة زعل وقام علي حيلو لمن عود الراكوبة كع في صنقورو
ونم
نحن الامريكان اهل العلم والغاية
ملوك الحرب للبـــــــسوي جناية
مساكين القرار والكل ورانا حفاية
لملوك العرب نحنا بنقلب الراية
طبعا الكلام ده بالانجليزي المهم انا كلامو ده ماحرقني لكن الحرقني العربي العميل المعاه قال ليه (هع هع) انا خليت الخواجة وقبلت علي العربي قلته ليه :-
ياضنب العرب يالعميل الخائن
كابين الريالات دائما عزمــــكم لاين
في بلد العجم سويتو فيها مــــــــدائن
كان راجين عمارة شوفوا خرابها البائن
ارضنا بالملاين قمحا دهـــــب وجناين
طبعا الكلام كلو بقي مجادلات شعرية وذي ماعارفين لا انا شاعر ولا متشاعر لكن الحارة والحقارة مابرضاها اه ياجماعة الخواجة طفر قام علي حيلو وانا خالف كراعي قام مارق علي خشم الراكوبة والعربي بي وراه وقف وقال لي (منتدي بتاعكم ده ولد هكر بتاعنا صغير يفرتقه بي نبلة) بس انا قمت ليك علي (تفرتقه انت ياخواجة ياشبيه ضكر الحمام )القي لي عود في طرف الراكوبة والخواجة ماشي علي عربيته بس ست الشاي الفي الراكوبة مسكتني اعقل اعقل بتجيب ليك جنيه بتجيب ليك جنيه (كفاية البشير ) لكن بعد ده لقيت لي طريقة رغم الحجازين والفو ليك بالعود لكن العربي المعاه كع كرع صرفوا منو بي ايدو العربي مو مدرب كراتيه )
ونميت
منتدانا العزيز محروس بالله القادر
ياخواجة السجم ترب العلوج وفواجر
مو موقع اباحي موقع نظيف وطاهر
محفل بالقران سيرة وحديث ومآثر
احزر يا خواجة انحنا السحاب الزاخر
تصميم ود يس فنا رهيب ومـــناظر
شرقية وغربية اتلموا ابعد حـــــاذر
فيه ثقافة فيه الراحة فيه جــــــواهر
العمدة ويس ود الحاج وعبد القـــــادر
ود كرم الله فارس قصص وخـــواطر
ود كيقا والسني وحمد جبروا الخاطر
شاعرنا ابقدير بالفطرة عقلو الحاضر
بت بشري ومكارم بت العقاب ومزاهر
اولاد الخليفة الجدهم كرم السيول الهادر
إحزر يا خواجة نحنا البعادينا مٌخــــاطر
ديل اهل الكتال شايلين سيوف وخناجر
شافعنا الصغير رعد البٌروق المــــاطر
نحنا للشرف حايزنوا ما بنــــــــــفاخر
شايلين التقيل ود القبيلة وياســـــــــــر
هيثم ود العبد مسلم وود الطــــــــــاهر
ود العجيل ود قدوم اسد الكدادة الماهر
قول يا اللسان صعب عدهم للآخــــر
ديل بالالوف للـــــسفينة مــــــــــواخر

طبعا في اللحظة الخواجة فرتق وما عارف كان فهم كلامي ده والله مافهم لكن انا بالزعلة كده مرقتها من زمتي رغم انو قصيدتي الفية ما انتهت –
ردا علي حسبوا لانو باع القضية موضوع الCIA

الاخ أسامة حسن السلام عليك يا اخوي وانا طبعاً تبيت من مواضيع امريكا وذلك لما ورد في هذه القصة اللي رديت بيها على محمد قسم السيد , ارجو الإطلاع عشان تشوف كرامة جدودك :
[quote="Mohamed Ahmed Eshiekh"]اخي ود قسم السيد , والله فعلاً الحكاية تغيرت لكن ما بسبب ما ذهبت انت إليه ولكنالقصة في غاية الخطورة , فقد زارني جدودنا زمان في المنام , زارني جدي ود البي وجدي ود الدرويش وجدي حاج بابكير وجدي حاج ابراهيم ود امحمد سعيد كلهم لكزوني بي عصيهم وحسيت بي رعب شديد , حاج بابكير شايليه إبريق كباهو فوق راسي شفت حاج ويس جاي علينا وجاري حسبو بي يد ويصقِّع فيه بالسبحة بالإيد التانية وحسبو يصرخ بي طول حسو : جدي توبة توبة يا حبوبة , بس وقفونا ليك الإتنين مع بعض , قالو لينا كمان بتدورو تجيبو لينا امريكا في البلد ,بتدورو تبقو زي بتاعين العراق الخيبانين ديل والله خبر! حسبو قعد ينكر وقال انا كنت بهزر ساي , بس جدي ويس صاج لصق ليه كف , انا سكت ساي ,قلت اصلو ما اتكلم اخدت لبيعاتي وسكت , قام جدي الدرويش لكزني قال لي شايف الجماعة ديلك , عاينت وقلت ليهو لا لا ما عرفتهم , لكن الجماعة كانو مكان ودشنين , قال لي ديل ناس جدك البي وجدك النزل وباقي أهلك القدام ( أول حاجة أنا قايلم ديل ناس صقر قريش وجماعتو ) قال لي والله ما تقولو تبنا أكان اسع نرميكم ليهم , زعلانين منكم بالحيل , بس أعلنا توبتنا , وشفت ليك حسبو دنقر في الواطة وملى خشمو تراب وقال ليهم أهه ان سافي التراب , قالو لينا هي نان الخلاكم تسوو كدي شنو؟ حسبو طبعا بتاع سياسة وفلسفة قام قال ليهم والله يا جدودي كانت المسألة فيها مساومات سياسية , بس قبال يتم كلامو ادوه ليك تنهرات قام سكت , انا ضحكت قامو ادوني ليك نهرة ست سكت . من ديك وعيك انا تبت توبة نصوحة وما ح اساوم فوق بلدي ولا ابيع حفنة من قمامتها بأعلى منصب في أمريكا . نسأل الله يغفر لنا ذنوبنا وإسرافنا في أمرنا .[/quote

والله يااسامة اذبح ليك كرامة !!!!! والله الله شافك !!!!!
الخواجة ده المشروع الهامل ده كل ماشافو !!!!
ليه أتكلم على ام فطير ؟؟؟؟؟؟ كلم جواجتك ده وقول ليه ام فطير ميهامل ليك !!!!
وانا هين الحمد لله الماسمعك الحاج بركات !!!!!!
السلام عليكم الاخ اسامة الموضوع حلو وشيق وجميل وكتبتو وإنت رائق الظاهر عليك
لانة تاليف ومنتاج وإخراج كل 100% شكرا لك وهههههههههههها

حى الله الاخ فارس وحمدلله على سلامة عودتك من السفر بالسلامة
والله موضوع جميل وفىغاية الروعة بس الخواجة دا اكان لميت ليك فيهو انا والله كان كاس للدرب اليمرق بية مايعرف يمرق بية
طبعا القصيدة جميلة جدا وذى ماقال العمدة الظاهر كنت رائق لانو عارفك لما تروق كدة بتلاقيك تطلع ابدعات
وفى انتظار جديد مشاركاتك اخى
ولك شكرى وتقديرى
والله الموفق

الاخ اسامة حسن والاخ محمد احمد ود الشيخ
لكم الشكر على تثبيتكم على ان ارض ام فطير فيها اطماع الدول العظمى وانه جدنا ود الدرويش وود تمام كانوا على حق ونظرتهم ورؤاهم المستقبلية كانت مدروسة ومعمول ليها الف حساب وانهم حافظوا على هذه المغتنيات النادرة الى ان سلموها الى الابناء حسبوا والريح وسمير وبجانبهم عمهم ود قسم السيد وابو عمار العمدة واولاد العبد بابكير حارسين ام فطير وحفير القربعة وبجابهم قرن جدهم ود عيق وود حسكنيت يابو طلعت


محمد قسم السيد حمد

انتو عارفين اغرب حاجة انت ترد علي موضوع ويكون واحد رد عليك بكلمتين ثلاثة وهو يعنيك تجد الرد البعدو ينتبه للكلمتين وينسي موضوعك كله يرد علي رد الرد فهو مردود

اخى حسبو موضع جدا ممتع وشيق هل من مزيد

شكرا للاخ حمزة اصالة عن نفسي ونيابة عن الاخ حسبو

سلام عليكم اهلنا الطيبين اين ماكنتم لو في السديرة او واشنطون ، والله لقد سررت جدا بالمجادلات الحصلت بينكم ولقد اثريتم الموضوع واضفتم له أبعاد جميلة وطريفة جدا، وهذا مبعث سروري ، مش عشان أنا الريس وبس والحمد لله اسامة ود عمي حسن ما استكثرها فيني وعشان ود عمي طبعا أنا لازم أشوف ليهو منصب يليق بمقامو، والله ياود عمي تستاهل اكتر من كده بس انشاء الله ربنا يكفيك شر الحاصدين والراصدين زي ابن عمو ود قسم السيد ده ، وطريقة الحوار العملتو معاك كوندي دي جد رائعة بس اكتر شيئ عجبني انك قلت ليها نحن أولاد الحسين والزهراء حبوبتنا عشان تعرف يعني نحنا احق بالرئاسة وكل المناصب دي يعني، ثم تانيا اخونا ورفيق دربنا ود الشيخ محروق عليهو لانو أنا باخد في تلبيعاتي وهو يضحك علي ، ماراعا زمان لما كان جدي عمر ود البي يزنقو في الدكان انا كنت بشترك معاهو في مؤامرات المخارجة والله يرحمك ياجدي عمر ياريت لو خليتك اديتو عصاية عصايتين بعصايتك ديك ،لكن برجع بقول ياجماعة ود الشيخ زولي الله يسامحو عشان ماعاوز افقدو لانو المعركة كبيرة والشغلانة ماساهلة لان كل العالم حيتابعها يعني لازم نتحزم ونتلزم، المهم ح الاقيكم تاني عشان ارد علي بقية الجماعة خاصة ود اخوي حسن علي عباس.
واتمني ان تواصلوا في بقية الحكاية.

الاخ حسبو حمد لله على السلامة , فتحت للناس موضوع وزغت وخليتم يبرطعوا يمين وشمال , وعلى صعيد آخر أشم في ردك دبلوماسية معهودة فيك عشان تحيد بعض العناصر في هذا الصراع , لكن أذكرك زي ما قال اسامة في جزئية محددة اننا اشراف وجدودنا قوم صالحين , وانا آخير حاجة مع جدودي وإرثي , لكن أوعدك أن لا أقوم بأي انقلاب ضدك ولا أساند أي حركة تتآمر عليك ولا أشترك في أي مؤآمرة ضدك , فنحن برضو أخوان , وكل ما أفعله هو دعائي لكم بالأوبة إلى الرشد , والسلام . ود الشيخ )

انا دائر اعرف ياحسبو

اختاروك انت بالذات ليه

عشان انت ود محمد سعيد

اسرة كبيرة وتشكل ثقل سياسي بالسديرة

ام راوا فيك حب السلطة والجاه

ولو على حساب الوطن

ام رد جميل لعملك

بالموساد في الفترة السابقة

في كل الحالتين انا من المعارضة

وحا أكلم بن لادن بمخططك

تحياتي / لطفي العبد ابوانسام

سلام وشكر لكل من كتب حرفا معلقا سواء كان من المعارضةاو الموالاة ،الاخ لطفي لك التحية بس كنت عشمان تكسر عيني من أولاد عمي العبد بقصد ابو فارس و بكري لانو بناكفوني دائما وبكري بالذات واقف لي برة ، لكن خيبت ظني فيك لكن مامشكلة يازول بعدين بنعرف نستميلك كيف..اما مسالة الاختيار دي نحن شعب نؤمن بان الحرية لنا ولسوانا ، ولو ماكان الكلام ده صحيح ما كان اوباما ال000 ده بقي مرشح للرئاسة ، وبخصوص الموساد وبن لادن نحنا نلازم نقتلع الارهاب والارهابيين من السديرة وماجاورها00 وياباش مهندس لطفي احسن تلفي نفسك والوقت قرب والانتخابات علي الابواب ونحنا فائزين فائزين رغم كيد الكائدين...