منتديات السديرة
أنت غير مسجل لدينا . للتسجيل اضغط على زر التسجيل


منتديات السديرة
أنت غير مسجل لدينا . للتسجيل اضغط على زر التسجيل

منتديات السديرة
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتديات السديرةدخول

اروع قصه سودانيه

power_settings_newقم بتسجيل الدخول للرد
+7
بلابل الدوح
حسبو العوض
bit-alhkeem
Star Girl
moon love
الشمالي
عسيلاتي
11 مشترك

descriptionاروع قصه سودانيه - صفحة 4 Emptyرد: اروع قصه سودانيهالإثنين أبريل 27, 2009 11:07 pm

more_horiz
ومرة مرة تمسك في حبال الغسيل وتتلف بي الملايي
واييمة
وووب علي
يا الله لي
ومرة مرة تعضعض في الهديماتالمنشورات
والداية تجي تقولها كلاما كدي ماهو مفروز
وتمشي تاني تغني مع النسوان الكبار:
بكري لو بالوليد
يا السمحة ام نهيد
يا السمحة حدالريد
وفجأة تسمع اسماء كواريكا يجيبن الفي الخلا
والداية تقولهن دخلوهالاااجوة خلاص وحصلوني بي الموية السخنة
وفجأة تشوف حرم دخلت عليهن شايلالا حلةبوخا طالع
ويقفلو باب الاوضة وشبابيك الخشب
وبين الهرجي أليل النسوان تضيع كواريك اسماء
وفجأة تسمع صوت الشافع يكورك وضلفة الشباك الاخضر الفوق
تتفتحوتسمع صوت رقيي: يا طارق اجر علي محمد وقوله جابولك ولد
وانا اطير علي الرجال في النيميي واقولهم اسماء جابت ولد
يقوموا يباركوا لي محمد ويديني شلن (خمسةقروش)
وارجع القاهم بيوزعوا في الحلاوة
واريتا حلاوة عدوك يمين تتلصق بين فكينك وتبقى تناتل فيها فشان تمرق
تقول عاجننها بي صباع امير... يمين حنكك وكتين تنتهي منها لامن يقع
من شدة المناتقة...

-
ميتة من الضحك معقول الكلام دة... يا سحر... سحر تعالي
وامغستنا مالك علي مناداها منهسي

descriptionاروع قصه سودانيه - صفحة 4 Emptyرد: اروع قصه سودانيهالإثنين أبريل 27, 2009 11:08 pm

more_horiz
نواصل انشاء الله

descriptionاروع قصه سودانيه - صفحة 4 Emptyرد: اروع قصه سودانيهالخميس أبريل 30, 2009 3:15 am

more_horiz
الحلقة 30
الحبيبين كيفنكم
البنيات جن داخلات ونايرات والايدين مفدعات لي وراء
صلاتي علي محمد..
جكس عوض: اهلا بالشباب
- يا مرحب كيفكم
- سحر: كيف عووضة هلا يا دكتور
- اهلا سحر
وحاتكم ايدي وكتين طقشت ايدينا يبست ضُُمة ضُمة
الشعر الليلي ضافرنوا ضنب حصان ويتمرجح من الكتف دة لي دة
وانا ازوزي معاهو بس درويش في حلقة ذكر
عوض بنيتو قعدت جنبو وسحر جرتلها كرسي قاصدتني
اخدتلي عيينيي لقيت الفستان حدو الركبة
يمين الرجلين علي عود الابنوس يرارين
- خالة البنات:هسا خالد دة ولدوهو في بيت ناس عوض
- ايي واللذيذي حبوبة عوض كانت نايمي وقامت مخلوعي
لمن سمعت الكواريك قامت مهجومي: انتو الفي شنو
- اسماء عايزة تلد
- الله يقلعها هجمتني هي وكتين ماها قادري علي الولادي
يوما داك ما تشوفلها اوضتا تاني تمشي عليها
خالة البنات بقت تزح من الضحك
جكس عوض ميتة من الضحك ختت وشها في كتف عوض: صحبك دة مجنون
- عوض: انا قلتلكم ماهو نصيح
سحر خجلت وختت يدينها في وشها ودنقرت علي ركبتها
الضفيري جات واقعي علي صدرها
يمين الرقبة علي برطمان المربة البيختو فيهو الكركار داك
تلمع ومتواسي وناعمي... شفت فيها وعاينت علي رقبة عوض
عضامها كلها ناطي علي تروس الجربكس... والعجب وكتين رجعت تاني
علي ضهر الكرسي والصدير قام معاها...
انا اصلي بقيت آآآبشوف غبيت كله كله
وصوف جلدي كله قام وما لقيتلي ريقا ابلعه
الله يقلعك يا عوض كان هريتني معاك
- خالة البنيات: لكن يا دكتور والله عندكم حاجات عجيبة خلاص
- ايي نحمد الله ما عندنا شي غير القرقراب...
نضحك ونصوتلنا سخيني ولا حرف أليل قراصي نلوغده ونتمه كوز مويي من الزير ...
مافي شي تاني... لانا عارفين الدنيي حاصل فيه شنو ولانا مدنها خبر...
نتلابس في الهدوم والشباطة.. والدنيي ماشي... بي هني ماشي وبي عندنا كمان ماشي...
راضين بي قسمة الله ومتيقنين...
- سحر: لكن يا دكتور حياتكم حلوة ما فيها عقد
- نان نعقدها اكتر من ماها معقدي نوصلها وين عاد
- انا قصدي انكم ماخدين الحياة بي بساطة وما عندكم برتكولات لا شي
- اييي برتكول شنو.. هو نحن وكتين ندخل علي بعض
بالله تجر سلك الباب وتلقى نفسك في وسط ناس البيت
- ام البنات: يلا يا شباب علي الفطور ان شاء الله يعجبكم
دخلن علي الصفري اكان القالكم السراويس ألت القراصي من الصيني ومغتية بي شيتا شفافا كدي
قالوا فشان تبقى سخني ما تبرد...
ماهن عارفين هناك بالله نقع لغفي في صحن الطلس حتى ان بقت مولعي علي جهنم..
والعجب البصل اللخدر والقرشي أليلو ومعاهو شطي خدرة... ومخاخيتك تتسايل
كملنا فطورنا ورجعنا لي اوضتنا عاينت بالشباك اشوف في شغلنا
البلاط نضيف والنجيلي خدراء.. قبلت علي عوض
- انت يا جنى هسي بنيتك دي ان بقوا دايرين يدخنوها يدخنوها وين
ماني شايفلي حفري بايني في حوشم دة ووشها علي قعر الصاج
والدلكي ان بقوا دايرين يكفوها وين يلقولم حفر مع البلاط دة
ترا الضفر بينضفوه في التكل علي وين يكسرولم طلح مع البلاط دة
وناسك ديل ماهن ناس كركار شي... نحن بالله ألاتنا بعد الساعة تمانية
تلقاهن منجعصات في الشملي والدخاخين قايمي ونور الحيشان مطفي
وبرطمان الكركار جنبهن وتسمع في: يا محاسن اتمسحي الطلح بيشقق جسمك
... والله يا زينب عضامي كانن ينتحن بعد اختلي كبي انجميت... كيفن
آبتنجمي يا بت امي وكمان طلح محمد العربي دة سمح خلاص... ايي ما ضارباهو
المطري وبيولع سريع...
- عوض هسا انا في شنو وانت في شنو
- مالك الصايدك شنو
- شفت عم البت دة مصنقر الليلي من اصبحت وقلبي ماكلني
- يا زول خت اليقين في قلبك آبيحصل شي
شويتين دخلت سحر صينية الشاي وتبعنها الخالة والأم وجكس عوض
- خالة البنت: انا سمعت كلامك يا طارق وكتين نبقى علي الطلح بنعرف نسوي شنو
- سجم خشم امي (رحمها الله) انت سمعتيني
- ايوة سمعتك وانا واختي ضحكنا... شكلك كدة ما ساهل
- ان ما متنا شقينا الترب
- جكس عوض: عوض بعد تشرب شايك بابا قاليك مر عليه في الصالون
يا ربي تستر

descriptionاروع قصه سودانيه - صفحة 4 Emptyرد: اروع قصه سودانيهالأحد مايو 03, 2009 11:22 pm

more_horiz
الحلقة 31
الحبيبين كيفنكم
البنيات جن داخلات ونايرات والايدين مفدعات لي وراء
صلاتي علي محمد..
جكس عوض: اهلا بالشباب
- يا مرحب كيفكم
- سحر: كيف عووضة هلا يا دكتور
- اهلا سحر
وحاتكم ايدي وكتين طقشت ايدينا يبست ضُُمة ضُمة
الشعر الليلي ضافرنوا ضنب حصان ويتمرجح من الكتف دة لي دة
وانا ازوزي معاهو بس درويش في حلقة ذكر
عوض بنيتو قعدت جنبو وسحر جرتلها كرسي قاصدتني
اخدتلي عيينيي لقيت الفستان حدو الركبة
يمين الرجلين علي عود الابنوس يرارين
- خالة البنات:هسا خالد دة ولدوهو في بيت ناس عوض
- ايي واللذيذي حبوبة عوض كانت نايمي وقامت مخلوعي
لمن سمعت الكواريك قامت مهجومي: انتو الفي شنو
- اسماء عايزة تلد
- الله يقلعها هجمتني هي وكتين ماها قادري علي الولادي
يوما داك ما تشوفلها اوضتا تاني تمشي عليها
خالة البنات بقت تزح من الضحك
جكس عوض ميتة من الضحك ختت وشها في كتف عوض: صحبك دة مجنون
- عوض: انا قلتلكم ماهو نصيح
سحر خجلت وختت يدينها في وشها ودنقرت علي ركبتها
الضفيري جات واقعي علي صدرها
يمين الرقبة علي برطمان المربة البيختو فيهو الكركار داك
تلمع ومتواسي وناعمي... شفت فيها وعاينت علي رقبة عوض
عضامها كلها ناطي علي تروس الجربكس... والعجب وكتين رجعت تاني
علي ضهر الكرسي والصدير قام معاها...
انا اصلي بقيت آآآبشوف غبيت كله كله
وصوف جلدي كله قام وما لقيتلي ريقا ابلعه
الله يقلعك يا عوض كان هريتني معاك
- خالة البنيات: لكن يا دكتور والله عندكم حاجات عجيبة خلاص
- ايي نحمد الله ما عندنا شي غير القرقراب...
نضحك ونصوتلنا سخيني ولا حرف أليل قراصي نلوغده ونتمه كوز مويي من الزير ...
مافي شي تاني... لانا عارفين الدنيي حاصل فيه شنو ولانا مدنها خبر...
نتلابس في الهدوم والشباطة.. والدنيي ماشي... بي هني ماشي وبي عندنا كمان ماشي...
راضين بي قسمة الله ومتيقنين...
- سحر: لكن يا دكتور حياتكم حلوة ما فيها عقد
- نان نعقدها اكتر من ماها معقدي نوصلها وين عاد
- انا قصدي انكم ماخدين الحياة بي بساطة وما عندكم برتكولات لا شي
- اييي برتكول شنو.. هو نحن وكتين ندخل علي بعض
بالله تجر سلك الباب وتلقى نفسك في وسط ناس البيت
- ام البنات: يلا يا شباب علي الفطور ان شاء الله يعجبكم
دخلن علي الصفري اكان القالكم السراويس ألت القراصي من الصيني ومغتية بي شيتا شفافا كدي
قالوا فشان تبقى سخني ما تبرد...
ماهن عارفين هناك بالله نقع لغفي في صحن الطلس حتى ان بقت مولعي علي جهنم..
والعجب البصل اللخدر والقرشي أليلو ومعاهو شطي خدرة... ومخاخيتك تتسايل
كملنا فطورنا ورجعنا لي اوضتنا عاينت بالشباك اشوف في شغلنا
البلاط نضيف والنجيلي خدراء.. قبلت علي عوض
- انت يا جنى هسي بنيتك دي ان بقوا دايرين يدخنوها يدخنوها وين
ماني شايفلي حفري بايني في حوشم دة ووشها علي قعر الصاج
والدلكي ان بقوا دايرين يكفوها وين يلقولم حفر مع البلاط دة
ترا الضفر بينضفوه في التكل علي وين يكسرولم طلح مع البلاط دة
وناسك ديل ماهن ناس كركار شي... نحن بالله ألاتنا بعد الساعة تمانية
تلقاهن منجعصات في الشملي والدخاخين قايمي ونور الحيشان مطفي
وبرطمان الكركار جنبهن وتسمع في: يا محاسن اتمسحي الطلح بيشقق جسمك
... والله يا زينب عضامي كانن ينتحن بعد اختلي كبي انجميت... كيفن
آبتنجمي يا بت امي وكمان طلح محمد العربي دة سمح خلاص... ايي ما ضارباهو
المطري وبيولع سريع...
- عوض هسا انا في شنو وانت في شنو
- مالك الصايدك شنو
- شفت عم البت دة مصنقر الليلي من اصبحت وقلبي ماكلني
- يا زول خت اليقين في قلبك آبيحصل شي
شويتين دخلت سحر صينية الشاي وتبعنها الخالة والأم وجكس عوض
- خالة البنت: انا سمعت كلامك يا طارق وكتين نبقى علي الطلح بنعرف نسوي شنو
- سجم خشم امي (رحمها الله) انت سمعتيني
- ايوة سمعتك وانا واختي ضحكنا... شكلك كدة ما ساهل
- ان ما متنا شقينا الترب
- جكس عوض: عوض بعد تشرب شايك بابا قاليك مر عليه في الصالون
يا ربي تستر

descriptionاروع قصه سودانيه - صفحة 4 Emptyرد: اروع قصه سودانيهالأحد مايو 03, 2009 11:22 pm

more_horiz
الحلقة 32
الحبيبين كيفنكم
والله من وصلت الحتة دي غلبتني الكتابي كله كله... لي شنو آآآبعرف..
ــــــــــــــــــــــــــــــــ
عوض كمل شايو ومشى علي محكمة المظالم ديك... والله وحده العارف الراجيهو شنو بي هناك...
- سحر: يا دكترة انت طبعا ما بتشرب شاي عشان كدة انا جهزت ليك عصير المنقة البتحبو....
- جكس عوض: بختك الناس ماخدة بالها منك..
- سحر زولة حلوة ياخي وانا بحب الزول البيهتم بالتفاصايل دة
- لكن يا دكتور انت ما حصل سألت نفسك الزولة دي ليه مهتمة بالتفاصيل حقتك
- هيييي انت جكسيك مشى علي ابوك وجيتي تهريني بي هني
- (ضاحكة) ياخي كدي خليني أسألك بي طريقة مباشرة: أنت عندك حاجة ما عاجباك في سحر ولا عندك ارتباط تاني وما قادر تقوله لينا
- لا دة ولا دة أها شن قولك
- طيب ممكن اعرف انت ليه متحفظ... تعرف انا بشوف نظراتك ليها من بعيد والله يا طارق نظرات زول ريااااااااااااااااااد شديد ومكتول عديل هههههههه.... بس حيرتنا معاك
خفت يا الحباني لساني يغلبني وأقولها والله رايدها لامن واقع علي قفاي... واصلو ان بقى لي قلبي وحات الله يبق بق بي اسمها ليله ونهاره.... ووكتين اشوفها ولا اسمع صوتها حيلي يموت ضُمة ضُمة... والعجيب وكتين تغمد عيونها وتفتحن تاني والبياض الفيهن يبقى اكتر من السواد.. اصلي بس اقعد اعضعض في لساني وألولو فيه علي سمكة القرقور في السناري وكتين يطلعوها من المويي... والعجب وكتين تكون هاجرة نصها بي حزاما عريض كدي والشي التحت الحزام يتمايل مع مشيها من هني لا هني... وانا زاتي أزوزي معاهو متل البومة الشايفالا فار ورويسها يزازي معاهو....
- يا بت الناس انا ماني قاعد اشوف تحت رجليني... انا بشوفي لي بعيد.. واختك دي ان بقيت قلتها بريدك... ياني الاتورطت والله قال بي قولي... انا ماني قاعد اريد الخنقي... حتى ان بقى ماتلنا زول انا تلقاني آخر واحد ابكي واطمن نِفيستِي إنه لسة عايش... دحين اختك الله بيسألني الما يريدها ماهو نصيح... بس علي قول خالتي سكينة الناس وكتين كانت تلملم في القروش نحن ابهاتنا كانو مزازين الانادي والمريسي... وهسي واقفين علينا... ومستننا نشيلم ونربي باقي البُطان الصغار.... دحين باقيلك في الدوامي دي عندنا حلا لي حب ولا مستقبلا خاص... هاااا زولا هاااا قصتنا ماها بايظي من الليلي ولا من امبارح... وإن بقى علي القلب تراهو ممكون وصابر وأنا آآآبقدر اورطلي زول معاي في ظروفا متل دي... دحين ناري باكلها براي...
- لكن يا دكترة دي تضحية فوق التحمل... وانتو ممكن تمشوا الحاجتين مع بعض لو عزيمتكم قوية... ياخي الحب دة ما ممكن يكون دافع يخليكم تمشوا لي قدام...
- شوفي يا بت الناس... انت بتقولي كدي عشان في حاجات ماكي شايفاهن... هناك الدنيي ماها متل دنيتكم دي... الحياة واقفي وماها ماشي لي قدام كل شي بالصف... وكتين تكون طالع لازم تشوف برامج باقي اخوانك كيفن عشان ما تنطاقشوا في البناطلين والقمصان والشباشب... يعني الواحد فينا وكتين يكون عنده مشوار لازم يشاور باقي البيت في اللبس... ووكتين كنا في المدارس.. وحاتك ردا واحد وقميص ويحيد ومشيحيد تقومبو وتقعدبو والرجلين اصلهن بس تحشرن في «تموت تخلي».. تمشي العشش يفصلوهو ليك من لساتك العربيات القدام وتدخله في رجلك الدخلي الياها... يمين لامن سيورو تنطبع في قدميك... ووكتين تطلع رجليك بس فطيسي رسمي... أها دحين كان ما كانت القرايي مجان وحات الله يانا المدعوكين في البناء دة لامن تقوم قيامتنا... أها ناسنا ديل كبروا وراجننا نشيل باقي العتَّاب المكوم في بيوتنا داك... فشان كدي حرام تظلملك زولا معاك وتحشرو في جهنم ألتنا دي.... خصوصا ان بقى زولا تريدو وعندو عندك مكاني كبيري....
- بس يا طارق كلامك دة هسي ما اعتراف صريح بالحاجات الجواك... حرام ياخي الشي الحلو دة كله يموت في ضلوعك انت براك...
- ياخي ما تجرجريني في الكلام... انا فضفضتة معاكي انت لانه غلبني اشيل الشي الجواي دة براي... انت وخالتي سكينة بس القلتلم الشي الماني قادر اقوله لي سحر....
- يا الله ياخي بس كدة ما كويس ياخي... قول ليها كلامك دة وريحها وخليها هي تقرر حاجاتها... يعني ما ممكن الحاجة تكون حقتكم الاتنين وانت تاخد فيها قرار براك.... كدة ما عدل..
- يا زولة أنا اصلي ما وعدتها بي شي... وأصلي ماني عندي شيتا اوعدها بيهو ولا شيتا اقدمو ليها... وان كان للألم أصلو ياهو أليلي تب.. قادر عليهو... لكن الماني قادر عليهو ... اخليلي زولا زين بالحيل متل سحر يتألم فشاني.. الدنيي دي مانا حارِلنا فيها شيتا نعيم.. وإن الله من كرمو لطف بنا كمان القسمي ألتو راضين بيها...
- طيب ياخي انت ليه ما داير تقول ليها الحاجة الجواك دي...
- موش أحسن من اعيشها في حلم مستحيل... واسببلها ألم وجرح..
في اللحظة دي دخلت علينا سحر شايلالها صيني فيها جك أليل منقي وكبابي.. وكتين ختت الصيني في الطربيزة ومالت فشات تقعد... شفت رُكْبينَها... الله بسألني تقول ما فيهن عضم... يشبهن المخدة وكتين يكونوا يا دوب منجدنها... وين لي ألات عوض عاملات علي رأس الكُنش كدي... الله بسألني يا جماعة عندها وجنتين علي زبادي «الدانيت» البجيبو اعلانه في الام بي سي داك... تسكت تمطق وانت تشوف فيهو..
جكس عوض دخلت لاااجوة.. وسحر جرت الكرسي وقربت مني... وانا شلتلي مخدي من السرير وختيتها في رجليني وهجرتها علي صدري... فشان ادس النتلي أليل قلبي..
- عجبتك المنقة يا دكتور
- تسلم يديك ياخي... حلوة شديد
- عوض ما جاء
- والله ما ظهر... خير ان شاء الله مافي عوجة
- ما عارفة بس انا مقلقة وعمي دة بالذات ما قاعدة اريده
- ياخي موش يمكن تكوني ظالماهو
- لا لا لا اصلو من يجي ويقعد مع ابوي كدة براهم بعرف انه في حاجة في راسو قاعد يقنع ابوي بيها... ودايما بتكون مصيبة... وهسي حكاية ينادوا عوض دي براهم الله يستر فيها...
- ما اظن في حاجة تخوف..
- الله يستر... عشان كدة انت ما عايز تقول حاجاتك...
- وكتين تكون حاجاتك جواك وماك قادر تقرر فيها... او يكون قرارها عند ناس تانين او في علم الغيب... شن فايدتها..
- ياخي انت ليه متشائم كدة... اعمل اي حاجة.. قول اي حاجة..
- القول عندي يا بت الناس التزام... وانا ماني قادر علي التزام ماني قادر اوفيهو....
- طارق (الله بيسألني لمن نطقت اسمي دة زي الكبوا فيني موية مسخنة اضنيني حسيتبهن تقال ومسخنات... وحيلي مات): ياخي انا عايزة اعرف حاجاتي ماشة وين... انا لا قادرة أطمئن وأخطط.. ولا قادرة ارمي القصة كلها وراي وامشي...
بعد تمت كلامها ده شالت يدينها وغتت وشها... وحسيتبها متوتري ودايري تبكي...
والله يا الزينين لا عرفت اقولها بريدك... ولا اقوم اضمها لي صدري واعوعي... ولا اقعد تحت رجلينها واخت يديني في ركبتها ووشي فيهن ولساني براهو ينطق: بحببببببببببببببببببببببك..

descriptionاروع قصه سودانيه - صفحة 4 Emptyرد: اروع قصه سودانيهالأحد مايو 03, 2009 11:23 pm

more_horiz
الحلقة 33اها يا الحبان جيناكم..
البنيي سكتت ودنقرت... وانا الكلام كمل في حلقي... طبقت يديني بين رُكَبي واتمحنت.. الله بيسألني العرق نازل من يديني زي نقاع الزير.. هسي يا ربي انا اسوي شنو... يا رب انت من صفاتك العدل... دحين حلني... يا مالك روحي حل عقدة لساني... ولا كمان حلني وخلني امشي لي أهلي...
ربكم رب الخير عوض جاء داخل... ووشو مقلوب ينعل قفاهو وعيونه محمري.. وينفخ في جضيماتو العلي السعن ديلك... انا زولي عارفو.. وكتين يكون ممكون ياها دي حالتو...
- طارق نمشي
- سحر: ياخي مالك مستعجل يا دوبها حداشر ولسة بدري علي الصلاة.
- عوض: ياخي يا دوب نمشي نستحمة وانتو ذاتكم تمشوا تشوفوا بت خالتكم...
- جكس عوض: شنو البسمع فيهو دة.. ماشين وين ياخي.. بعدين انا موش قلت ليك عايزاك..
- ايوة بس الوكت اتأخر شوية
- كدي تعال انا عايزاك
جكس عوض ساقت عوض ومشت لاااجوة.. وسحر قبلت علي:
- صحبك مالو
- والله ما عارف.. بس هو لمن يكون زعلان ما بيحب يتكلم، وشكله كدة في حاجة ما مرتاح ليها..
- انا ما قلت ليك.. عمي دة غير المصائب ما بتجي من وراهو حاجة
- كان علينا نحن متعودين يا سحر.. الحزن دة بقى ساكن رسمي في بيوتنا، حتى ان بقى مشى بنستغرب موش بنفرح...
- ياخي انا ما بحب نبرة اليأس العندك دي
- دي ما نبرة يا بت الناس، دة واقع نحن بنعيشه بشكل يومي... اقدار ربنا صعب نهرب منها... عشان كدة انا كنت رافض الموضوع دة من اصله..
- يعني انت برضو عايز تكتل مشاعر الناس ديل زي اعمامي
- انا لو علي عايزهم يتزوجوا من بكرة... يا بت الناس انا بقول كدة لانه بشوف الشئ الحوليني كويس.. الحب من غير قراءة للواقع بيبقى حلم صعب تحقيقه وألمه حا يكون أكبر بكثير من لذته...
- يا طارق أنا لمن قابلناكم حسيت انه الواحد لمن يكون عايز حاجة بيصل ليها.. انتو كنتو بالنسبة لينا أمل كبير خلاص... ممكن تقول قدوة عدييييل.. طلبة جامعيين وشغالين طُلب عشان يحققوا حاجاتهم.. ودة الشي الخلا اختي تحب عوض.. هنا أي نعم كل شئ متوفر بمقاييس القروش... لكن في حاجات كتيرة ناقصانا أقلها كيف نختار حياتنا بنفسنا... عشان كدة لمن اختي اصرت علي عوض ووقفت قدام البيت كله حسيت اننا ممكن نعمل حاجة.. ممكن لأول مرة نقول لي ابوي واعمامي نحن من حقنا نختار... انا ما عايزة يزوجوني زي بنات عمي ياخي...
- يا الله ياخي... هنا وهناك نفس الشئ.. الألم سيد الموقف مع اختلاف اسباب هنا وهناك... تعرفي انا بعجبني جدا الونسة معاك بحس كأنه بتكلم مع زول بعرفه من سنين طويلة شديد... زول كدة لمن تقعد جنبه تنسى الكون... لكن.... ياخي نادي عوض خلينا نمشي
- دة اعتبره نوع من الهروب
- يا سحر... يا بت العمارات... انا ما عندي حاجة اهرب منها... انا بحاول اهرب من جواي... بحاول ابعد عن نفسي عشان اقدر اعيش، الجواي كتير وما عايز اجري وراهو عشان احققه... لانه ما بيتحقق..
- أول مرة احس بالمرارة الجواك دي... كنت دايما بحس انك مقبل على الحياة بتضحك من جواك...
- بضحك من جواي يا بت الناس عشان ما اطرشق... عندي احلام كتيرة ما قادر احققها... والحياة اهي ماشة.. والمسافة من الامتداد لي مقابر الصحافة ما بعيدة... عشان كدة لازم اضحك واقرقر... انت زولة كويسة يا سحر... وجواك كمية من الحلم والأمل ممكن لو بذلتي مجهود بسيط انا متأكد بتصلي... ما زينا نحن..
- اصل بدون مقاديف... واصل لي منو؟؟؟؟
- المهم انك ما ترجعي وراء... انسي الامتداد.. فوتيهو وحا تصلي
- حتى لو كان الامتداد دة المحطة الانا عايزاها
وحاتكم لمن قالت كدة... جسمي خدر... واتذكرت انه دي السنة الاخيرة لي في الجامعة... وطريت اغنية حميد:
حان الامتحان من وكتو بس فاضل شهر
وما اظني من جور الزمان انجح واجيب ليكم نمر
زينوبة كر من حالي كر قاعدلي في قيزان جمر
وقفت علي حيلي وجيت ماشي مسكتني من يدي زي الضربتني كهرباء:
- طارق ما عارفة بس عليك الله ما تسافر قبل ما اشوفك
- إن شاء الله قولي يا رب... نادي لي عوض
عوض جكسويتو جات ماسكة في يده وبتنقنقلو تحت اضنينو... بس هو سارح.. القصي باين عليها كبيري...
ودعناهن ومشينا علي أهلنا كداري لا ناضمني لا ناضمتو...
استحميت ومشيت الصلاة لقيت عوض خاتي مصلايتو وكتين شافني قلبها وقعدت جنبو وطبقنا سفنجاتنا بي ورانا.. والواطة حر وسمومها لافح... وبدأت الخطبة... الله يرحمك يا العباسي امام الامتداد.. كانت الخطبة عن عذاب القبر... قربت امشي اقوله ياخي عذاب القبر دة خلو ترانا ماشينلو ماشينلو... كدة خلنا في عذاب الدني دي...
كملنا صلاتنا عوض قام قبل ما يسبح وخلالي المصلاية ومشى...
مشيت البيت اختلي غمدي واتغديت وصليت العصر ومشيت علي بيت ناس عوض... لقيت خالتي سكينة في مصلايتها تصلي جريتلي بنبر وقعدت جنبها.. بس مع السلام عليكم السلام عليكم قالتلي:
- طارق ناولني حُقتي
- انت اصلك لا تسبحي لا شيتين طوالي علي الصعوط
- أي كدي أدني اللسف ياخي هو الله دة الماهو عارفه شنو فشان يوروهو ليهو
- انت باقيلي جنيتي
- أييي جنيت وكتين سمعت كلامك ومشيت خطبت لي صحبك
- هو وينو ماني شايفو
- ابى يتغدى وبس ساكت لبس سفنجتو ومرق.. يا ولدي انا قلبي ماكلني عليهو يا وليدي امشي شوفه وين...
- ما تهمي شي انا عارف بلقاهو وين...

descriptionاروع قصه سودانيه - صفحة 4 Emptyرد: اروع قصه سودانيهالإثنين مايو 04, 2009 3:10 am

more_horiz
والله ياعسيلاتي دي فعلا اروع قصة سودانية بس وانت وطارق جبريل الشغال فيها نجر اخضر شعتفتو روحنا لامن مرقت . عليك الله يا عسيلاتي لو القصة متوفرة عندك كاملة كبها لينا مرة واحدة خلينا النرقد رويحتنا دي , الله يقطع العوض وسنين طارق ذي ماقطعور نفسنا

descriptionاروع قصه سودانيه - صفحة 4 Emptyرد: اروع قصه سودانيهالأحد مايو 17, 2009 3:44 pm

more_horiz
الحلقة 34
من دربي داك مشيت علي المظلة الفي شارع الصحافة شرق..
ياها بُكانا وكتين تضيقبنا.. وكتين نزعل نمشي نقعد فوقها ووكتين نفرح نتوهط فوقها.. ولفت علينا وولفنا عليها.. فيها قرينا (ماجدولين) واستمتعنا مع (مصطفى سعيد) وحبينا (البحث عن وليد مسعود) و(مدن الملح) و(مائة عام من العزلة).. ما خلينالنا شي ما سويناهو فوقها حتى القرايي سويناها هناك... تمرين 23 بتاع حساب المثلثات الصعب داك حليناهو فيها... شاغلنا فيها بنات فاطمة عبد الرحيم رحمها الله... ووكتين مات صديقنا فتحي رحمة الله عليه بعد الدفن مشينا انا وعوض قعدنا فيها نبكي...
والقعدي فيها حسب الحالة.. وكتين نكون فرحانين بنمشي سوا ونحكي عن الشي المفرحنا... ووكتين نكون زعلانين الزعلان بيمشي عليها في الأول والثاني يبراهو...
وصلت المظلة وعيني لي عوض متشنقل وراسو متوسد السفنجات وكرعينو المكعوجات ديك تاكلِن في حديد المظلة علي المقصُوصة المعلقالا في مسمار في التُكل .. اصلي ما ناضمتو.. لقيتلي ورقة ألت فلسكاب جنبو وفوقها قلم بيق.. ومكتوب فوقها:
السمحة يا ست الخلوق
الدنيا من بعدك عذاب
لا حالفة يوما تحن
لا عايزة تسعدني وتروق
البسمة وحاتك غالبها المروق
والدمعة سايقاني سوق
ما قلتلو شي مشيت علي الكوشة القريبي ولميتلي علب ألات صلصة.. ومشيت رصيتن فوق بعض وجبت الحجار ختيتن جنبو وبقيت اشوف في الحافلات والعربات ماشي فوقنا وتنوني علي الجقور وكتين يكتشفلهن بُكان في المخزن فوقه عيش...
عوض قام يرمي في العلب بالحجارة ومرة مرة يشرد بعيد وعينو في الفسحي البين الامتداد واركويت (هسي اتملت ملي)...
- اسوي شنو يا طارق
- تسوي شنو في شنو
- الراجل دة قال لي بديك ستة شهور بعد تتخرج عشان تعمل العرس وتتزوج البت دي وكدة بكون ما قصرت معاك.. قال لي يا ولدي الناس اكلوا لحمنا وخطبتكم دي طولت وانا بقيت ما قادر اوري وشي الناس
- وانت قلتلو شنو
- هو ما اداني فرصة شان اقولو شي.. قهمني وكسر مقاديفي من الاول.. ومعاهو اخوه النحس داك..
- أصلك وقفت مبلم قدامهم وما قلت شي
- ياخي أقولك دة يشيل ودة يخت قبل ما افتح خشمي التاني ينط في حلقي.. لكن قلت ليهم انتو عارفين وضعنا في البيت وتاني ستة شهور ماهن كافيات فشان اجهز واعرس...
- اها..
- قالولي ما ترد هسي كدي امشي ورتب امورك وانت علي وشي امتحانات بعد تنتهي وترتب امورك تعال قولينا رأيك...
- طيب الجكس كلمته..
- ما قدرت... خفت عليها.. لو سمعت كلامهم دة بتموت...
- نان الحل شنو
- انت شايفلك حل.. القصي بايني ماها دايرلا درس عصر.. عمها دة ابو الولد الكان دايرها.. وهسي ضاغطين علي ابوها وشافوا الحِجى ألت الوقت دي عشان ما يكون عندهم ذنب ان بقوا فسخوا الخطوبة..
- طيب القول شنو... يعني إنت أكنو فهمك شنو
- انا ناوي اشوف خالتها عشان تدخل في الموضوع غير كدة ما عندي حل
- طيب والبنيي حا تعلقها كدي وما تقولها مالك مكوزم (مادي بوزك) كدي..
- والله يا طارق ماني عارف اسوي شنو حتى امي ما قدرت اقولها.. حاسابي بس ماني داير اكدر عليها.. وكتين اشوف في تعبها مقابلي اللقيمات والصيجان انعل ابو الفقر خصوصا وكتين يجي مصطفى اخوي ماشي ولابلسلو رداء مقدود ماشيبو المدرسة وتمسكو امي كل يوم تخيتو ليه وتاني يتفتق... باقيلك دي حالة ألت عرس.. افوتهم امشي وين ومحمد اخوي الحمل تقل عليه والمسكين لاهو قادر يتكلم لاهو قادر ينقنق وانا جيت وسويتها خطوبة وعرس وحب وجن...
- ياخي بتتيسر لا تسدها في وشنا... هسي انا قاعد اقول انت حا تفتحلنا النفاج نطلع من الفقر دة...
- يا زول نفاج شنو.. انا باقيلي دة زردوية ألت مشنقة وياني الحا افطس فيها واحتل ضُمة ضُمة..
- إني آمنت بالله يا زول اليشوفك متحنبك وكتين كنت اناضمك زمان ما يشوفك هسي... ياخي مشيت الصعب وفضلك الساهل..
مالك داير تتجن في آخر الطريق...
- طارق جبريل.. القصي بقت ماها ساهلي.. كفتين محال يتعدلِن.. يا أهلي يا العرس.. يا اما انساهم وامشي اشوفلي طريقة اعرس البت دي يا كمان اكمد المغصة في قلبي واشتري أهلي.. دا الشي الشايفه أنا وماني شايف غيره هسي... تعرف قبيل كنت بسمع في اغنية شادية:
شادية ما عارف ألت الله تراني بزرع
دحين من هني لامن اتخرج يحلها الف حلال... وتراني بزرع...

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 3:57 pm

more_horiz
35)

كملت يا الحبان امتحاناتي وحمدت الله وسافرت لي أهلي...
لمن وصلت لقيت أبوي يعافر في النيمي القدام البيت...
قالدني زين وقالدتو... سبحان الله أبوي دة رغم الصعوبيي المالية وشو دي...
علي وكتين واحد من بطانو يكون مريض ولا مسافر يبقى مسكين خلاص لامن يحنن...
دخلت قالدتة ناس أمي (رحمها الله) وأخواني ودخلت اخدتلي دش كارب بي صابونة لوكس
لامن بقيت اراري.. قلنا نستفيد من نورة مصر وناخدلنا حوامة في الحلي قبل ما نغبش...
وطلعت مشيت ناس خالتي سكينة.. جريت سلك الباب ودخلت قحيت وعيني للتُكل مقنطرة فيهو
خالتي سكينة... والله يا الحبان قالدتني تقول ولدها بالجد...
- والله يا ولدي أنا وكتين تسافر.. بيتكم والحلي كلها قاعدة تمسخ لي... وحاتك إن ما أمك ما بمشي عندكم...
- إنت وكتين قاعدة تريديني قدر دة ما قلتلك الصعوط دة خلي مالك آآبتسمعي كلامي...
- يا ولدي التمباك قاعد ينسيني هم البُطان ديل... بقينا نزرق فيهم واحد وراء التاني.. وهسا غلبنا نربيهم...
- إييي بيتربوا زي الباقين وبعدين لامن دربك يمرق بتتذكري كلامي دة.... وين عوض...
- بهناك في الصالون قارصاهو نحلي في وشو كله مورم... بس يا ولدي الأيام دي شكلو مهموم كدي مانا عارفاهو مالو...
مشيت الصالون لقيت عوض لابسلو رداء بس ومشتح كرعينو الشينات ديك في شناط العنقريب وحاتكم بس البرجل ألليل
علبة الهندسة داك... ووشوا من القرصة ألت النحل متختخ ومورم عِلِي اللخوخة...
شلتلي كوز موية دلقتو في وشو لامن قام مخلوع ولامن شافني نطة علي حيلو في العنقريب وقالدني زييييييين...
اخد حمامو وطلعنا لي حجارنا في خشم الباب...
- أها يا دنجوان العمارات أخبارك...
- والله يا طارق الدنيي ضايقابي والمشكلة غيرك ما بعرف افتو مع زول تاني...
- يا ساتر الحاصل شنو... مالك جكسيك ومعاك.... وما عندك أي ملفات ضيقة...
- ياخي الراجل الغليد دة الأيام دي متلحني: حا تعرس متين وحا تسكن وين وناوي تشتغل شنو...
- ياخي دي ما أسئلة عادية أي أبو ممكن يسألها وبعدين ما تنسى إنه قصتك دي كلها غريبة من
الأول والراجل عايز يطمئن على بنتو ياخي...
- لا أسئلتو ما بالشكل الإنت قاعد تقولو دة.. يعني أنا قريت صيدلة حا أشتغل شنو يعني،، طُلبة..
أنا حاسي فيها غتاتة كدة وقدر ما أقول للجكس كدة تقول لي ياخي إنت بتكبر الموضوع ساكت...
مرة كلمت خالتها اتهربت مني وما ردت علي رد مقنع..
المهم بكرة أنا ماشي عليهم بس ما في البيت حا أقابلها جنب النادي السوري ونتمشى في الشوارع الهادئة ديك
وبتكون معاها سحر ونناقش الموضوع معاهم...
- شنو نناقش دي... إنت تناقش براك أنا كمان فوق شنو....
- ياخي إنت ما عايز تشوف سحر والله البت بتحسب في الأيام لي جيتك...
- شوف يا عوض عليك الله ما توكرني البت انا كانت مزازاني في نومي هناك.. دحين ياخي أنا خلني..
- إنت حا تزوق كدة لي متين سيك سيك معلق فيك...
- لا يا أخوي أنا ماني زيك أنا لي هسا لا قلت بريدك ولا إحساسي بيك حارقني في جوفي...
- (يضحك) المشكلة كلامك البين السطور كله واضح أنا قريتو...
- النبي فوقك كلامي فيهو شي يمسكوني منو..
- (يضحك لامن اتشرق) والله يا طارق أنا لو كنت جكس ما حا أفهم من كلامك إلا الريدة..
- كان كدي التراب في خشمي... ياخي الخرابة دي ذاتها تقول كانت شغالة في البوستة
ياخي كل تلاتة يوم جواب لامن بقيت اهضرب براي... لكن شيتكم دة أنا ماني قادر عليهو
ياخي أنا وش أبوي شفتو بعد دخلت الجامعة... أمشي أقولو داير أعرس.. يمين علي ينحرني شخخخخ..
- عاد شيل شيلتك بكرة حا اشوفك حا تسوي شنو...
- ياخي انا من هسي رجليني بقن ينطاقشن زي العندي شلل أطفال...
- كدي قوماك علي البوش ولي بكرة ربك كريم

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 3:57 pm

more_horiz
(36)


جاء العصر وقشرنا ومشينا على الظلط واتشعلقنالنا في حافلة زي الضبابين في الباب..
وصلنا قبل المواعيد ووقفنالنا في ركن جنب النادي السوري...
- هسا يا عوض عليك النبي جايبنا بدري كدي لي شنو
- ياخي احسن من نجي متأخرين بعدين ياخي أنا مقلق شديد ما عارف ليه
- ياخي انت موش الجكس طمنك وبعدين انت خاطب رسمي ما لعب يعني
- بس ياخي ابوها الأيام دي مركب ليه وش وشكلو كدة حا يدق لي جرس
- ياخي انت بتكبر الأمور براك..
ظهرن البنيات من بعيد كدة ماشيات يتفدعن... وحات الله سمحاتلهن جنس سماح
أنا أصلي كان لي.. بقيت ارجف كلي وخشمي بقى مر خلاص بس تقول عندي ملاريا
وجاني هبوط رسمي وجسمي بقى ماهو قادر يشيلني.. واحناكي بقن يكركبن زي حديدة التلغراف.. كككك كجك كككك
وعوض يبلع في ريقو....زي البقرة وكتين تتوهط وتقعد تجتر في البرسيم...
وحات الله حنيت عليهو... البنيي دي إن بقت طارت منو أنا حا أعوعي قبلو..
- جكس عوض: يا سلام ياخي الدكتور كله معانا حمد لله على السلامة..
- الله يسلمك مشتاقين والله
- حمد لله على السلامة يا دكتور
وحاتكم يا الحبيبين البت دي وكتين مدت لي إيدها اتلبشت رسمي بس فضلي
يدقولي الزار... يمين مسكت ايدها وغلبني افكها كله كله... وجسمي كله مشى موية
البنيي ندياني ولابسالا قميصاً بني طويل كدي وتحتو بنطلون جينز والرجلين موهطات
في شبشب ليهو سيور كدي أليل جلد... والله بيسألني الاصبع أليلا الكبير زي الزلابيايي
وأصلي من غير وعي كنكشت في ايدها زي الاسمنت وكتين ييبس في الكوريق...
.. عوض فقعلو ضحكة لمن خلعني: يا دكتور انت حا تمسك يد سحر دي كتير...
الله لا تكسبك يا عوض شقيش تقبل.. .
وإن شاء الله الراجل الغيلد دة يحميك ليها...
إن كان أزيتني... أنا لاني قدر على الشي دة لاني حملو...
- كيفك سحر إن شاء الله بخير
- والله بخير بس فاقدنك
انت فاقداني أنا... وأنا فقدتة كله كله..
- تفقدك السعادة إن شاء الله
- عوض: يا طارق حا نتمشى شوية في شوارع العمارات
- أيي أحسن أصلها شوارعن ماها متل حقاتنا.. هاديي وحتي طيرم يغني ماهو زي ود أبرق أليلنا
اليوم كله مباري عمدات النور يلقط في الجندب وما خلالو زنكي ما بنالو فيهو عش..
لكن شوف طيرم هنا من شجرة منقي لي جوافي لي تمر هندي ..
حتى إن بقت صبت مطرة ما تسمع حسها في بيوتم المسقوفي صبي دي..
موش زي زنكينا... والله لا تعرفها مطرة ولا معركة ألت طالبان... طق طرق ططق..
ولا جالوص ناس عوض وكتين المطرة تخرتو بي زبالتو وترميهو جنب البيت والعجب وكتين يخمر
تاني يوم... يمين العفني تسد نخرينك لا تعرف نفسك في الحوش ولا في المستراح تزوزي فوقك الضبابين...
- سحر (تضحك): والله يا دكتور انت بتبالغ
- جكس عوض: عشان كدي خالتي كانت عايزة تجي معانا.. نفسها تضحك معاك لكن سحر
قالت ليها ياخي حا تأخرينا...
سحر... سحر... نان هي سحر نصاح... والله المثل بيقول تختها في الجرح يبرى... دي يختوها
في دبرة تبرى... يمين كسر مقلم كله كله يجبر... وااامغستي أنا...
عوض طبق جكسيهو من يدها ومشوا لي قدام يتهامسوا وأنا وسحر من وراهم...
وحاتكم يا الحبيبين أخدتلي شوفي في وشها... وحات الله قمرة رسمي والعجب الخصلة النازلي
من شعرها وسط عيونها وتتمايل من الرموش دي لي دي زي زمبلك ساعة الصالون السمحي ديك... وانا قلبي ينطط معاها...
- كيف يا دكتور كانت السنة دي
- والله يا سحر عادية والبيطرة دي الله لا تكسبها كلها جري
- يا الله ياخي اول مرة تقول لي سحر كدة من غير القاب
يا ربي أنا هسي أقبل وين من وجنات البنيي دي...
نان أنا أسوي كيفن مع جبيرين وكشيرة وشو ديك وجبهتو وكتين يكرفسها زي شارع الدقداق...
وحات الله ان ماني خايف منو كان قلتلو الليلي يحصلني عوض...
- ياخي انا ما عارف اقولك شنو بس جواباتك خففت علي كتير في مصر..
- انا كنت بكتبها ليك لانه دي رغبتي... كنت بحس انه عايزة اتكلم معاك.. ما تسألني ليه
- يعني أنا ما كنت عايز اتكلم معاك
- انت عندك قدرة عجيبة إنك تدس حاجاتك وأنا ما عارفة بس حاسة إنه ضايقتك
- أبدا والله... ما تقولي كدة ... لكن... والله ما عارف أقوليك شنو... ياخي الدنيا دي ماشة بالمقوب
- كيف يعني...
- يعني في حاجات تكون نفسك تسويها... وجنبك بس ما قادر تطولها... الظروف تجبرك إنك تتخلى
عنها مرغم ما بي خاطرك يعني... أنا وعوض ما اخترنا ظروفنا.. لكن لقيناها واقع قدامنا...
- بس العواطف صعب جدا الواحد يكتمها جواهو...
- العواطف دي لو ما مشت حسب الشي المرسوم ليها بتكون نتائجها كارثية
- ياخي الظروف ممكن نطوعها لو حاجاتنا كانت صادقة من جوة
- تعرفي يا سحر أنا أحيان كثيرة بحس إنه إنت أكبر من سنك كتير وحاجاتك مرتبة كدة
وعندك إحساس عميق بالناس حوليك....
- دي شهادة يا دكتور اعتز بيها... بس يا ريت أقدر اعمل كل الحاجات الفي نفسي... حاسة انه ما حا أقدر
- ياخي إنت الدنيا قدامك لسة وأوضاعكم الاجتماعية حا تخليك تحققي حاجاتك...
- تعرف أنا بديت أكره إنه نحن أغنياء... من موضوع عوض مع اختي والحاجات الحصلت فيهو كرهت القروش
- ليه ياخي في زول بيرفض النعمة
- ياخي القروش لمن تكون سبب تعاسة لي اختي الله ينعلها
- كيف... على فكرة من كلام عوض أنا حاسس إنه في كارسة جاية... ما عارف ليه
- أقول ليك شنو... بس أنا ما مطمئنة.. اعمامي كتروا من جايتم لي ابوي ودي ما عادتهم

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 3:58 pm

more_horiz
37)

واصلنا ونستنا مع البنيات لامن وصلنا اسكريم 41..
وعزمننا الداندورمي... عوض يسكت يتمطق في الداندورمي ويتبسم ويكب في الجلكسات...
انا نسيت داندورمتي وسرحت في الدنيي الماهلي دي...
يعني هسا لو الواحد ظروف اهلو كانت احسن من كدة موش كان ساهل جدا انه الواحد يقول
للبت دي الشي الكاتمو في نفسي وشغال يهري فيهو ليل نهار...
الغريب في الموضوع انه امي (رحمها الله) حاسابي ودايما تقولي: يا ولدي الدنيي دي شن طعمها
ما تسوالا شي والله دة كريم قاعد يدي الجني دحين انت تم قرايتك والله بيديك الفي مرادك...
وحاتكم يا الزينين اتلفت شفت في وش البنيي... البت دي لامن تحدر عينها وتشوف فيني من تحت تحت
وبياض عيونها يبقى اكبر من السواد زي ملاح النعيميي المضرضرلهم فيهو فلفل اسود في طرفو
احس بي روحي دي عايزة تمرق ضُمة ضُمة... ونفسي يتخمة...
والعجب وكتين تعضعض في شفايفها بي سنونها البيض ديك بس طرف قراصي متمري بين
صحنين ألات صيني بُيُض... اصلو قلبي ينتلو في جنس نتلي علي المتري (طرمبة الموية)...
والعجب وكتين تضحك ويظهر لسانها ولهاتا... يمين بالله خُشافايي في كورية جلي...
المغسي تركبني من راسي لي رجلي وقلبي يقولي امسكها من ايدها واعوعي وقلها وحات الله بريدك...
- دكتور طارق مشيت وين...
- ابدا والله بس بفكر في الدنيا العجيبة دي..
- ليه عجيبة...
- الصدفة العرفنة فيها بعض كانت كلها عجيبة مع انه نحن تلاتة يوم شغالين عندكم وما شفناكم
يعني كان ما شلاقة عوض ما كنا عرفناكم ولا هسا قاعدين معاكم... ولا حتى نحلم بي كدة...
- ندمان انك عرفتنا ولا شنو...
- عيب عليك ياخي تقولي كدة... بس انتو ممكن تكونوا ندمانيين... نحن لا
- منو القاليك... عليك الله شوف في عيون جكس عوض دة وهي بتتكلم معاهو...
موش بتحس بانها كأنو الدنيا دي كلها حقتها هي براها...
- تعرفي أنا دايما بسأل عوض إنه اختك دي شايفة شنو سمح فيهو... يعني نحن ناس على باب الله...
- انت بتقيس الحاجات بالقروش بس... يعني حتى المشاعر بقت عندها تمن..
- لا انا ما قصدت كدة لكن انا صراحة ما شايف حاجة بتميزنا عن باقي الشباب ويمكن نكون ما عندنا
مؤهلات في مجتمعكم دة كله كله... يعني لو في ميزة صغيرة إننا ضاربين الهم بالفرح ودي الدنيا كلها عندها...
- بس يا سيدي قلب اختي انا من الدنيا دي كلها ما حب غير عوض الانت شايفوا دة
- هو قاعد يقول يضع سره في أضعف خلقه... وانا ما شايفلي سر عندو
- انت في حاجات كتيرة ما شايفها... متشائم بي شكل غريب خلاص
- ما عندي حل غير اتشاءم... وانا لي هسة ما مقتنع انه عوض ممكن يتزوج اختك وشايف انه مشوارو طويل جدا
وما اظن اهلك حا يقدروا يصبروا عليه خصوصا ود عمك كان جاهز تقريبا وما ناقصوا حاجة.
- المهم انه اختي عايزاهو ودة حقها...
- اقول ليك حاجة عوض ما حا يتزوج اختك دي موش لانه ما عايزها... بالعكس هو بموت فيها بس الظروف كلها شغالة
ضده... وضعوا في البيت وحاجة اهلو ليهو وحكاية اعمامك دي ما مطمنة...
- والله يا دكتو طارق انا برضو ما مطمئنة وحاسة انه في حاجة شغالة من ورانا كلنا بين بابا واعمامي وخالتي يوم
قالت لي الله يستر... لانه راجلها قال ليها بابا اتكلم معاهو في الموضوع دة وشكله عايز يتحجج علي عوض بالوقت
مع انه راجل خالتي رايه انه عوض زول كويس والبت عايزاهو لكن انا عندي اعمام صعبين شديد ومسيطرين علي بابا
- يعني عوض تخوفه في محله
- اكيد بس انا قدام اختي ما قاعدة اقول كدة لانه خايفة عليها شديد... وماما مقلقة شديد من الموضوع دة
ونحن طالعين قبيل بابا قال لي اختي كلمي عوض انا عايز اشوفو ضروري يوم الجمعة يجي بدري شوية
وطبعا اختي مفتكراهو موضوع عادي بس انا من لهجة كلامو ما مرتاحة... لكن اقول ليك حاجة... انا خايفة
خوف شديد خلاص...
- بعد دة كله ما عايزاني اتشاءم...
- العايز ليه حاجة بيسعى عشانها ولا شنو يا دكتور...
- دة كلام صاح... بس لمن تكون متأكد إنه الحاجة دي ما حا تصلها... مقاديفك كلها بتقيف...
- انت حاول وبتصل...
حسيت البنية بتدردق فيني عديل كدة وعايزاني اقع بي لساني... لكن وين... مافي طريقة...
اهضرب كدة جواي واتحرق اخير من بعدين اقعد اعوعي قدام الناس واقعد افتفت وانبرش...
- جكس عوض: يا دكترة شنو ياخي قاطع مننا ياخي ادينا حنك حنكين...
اديك حنك انا... هي اختك دي خلت فيني حنك ما وقع من زمان.... ان شاء الله انقصة انا..
- يا ستي انت فاضية من عوض عشان تسمعي حنكنا...
ساقتني من يدي ومشينا قدام سحر وعوض وسبقناهم...
- ياخي انت عايز تنطق متين ياخي حرام عليك
- انطق اقول شنو وانا مبلم كدي...
- طارق جبريل انا قريت جواباتك كلها... يمين بالله اي زول يفهم منها انك بتريد سحر
- اقول ليك شنو... اها انا لو قلت ليها بريدك وما حصل نصيب اقبل وين...
اقع البحر... ولا اقول لي ابوي اطلع فيني بالقندران دة فجخني...
- (تضحك) ما للدرجة دي يا دكترة... بس انت قح ونحن بنكمل الباقي...
- اقح وين... هو انا صدري فضل فيهو هواء...
- (تضحك) مليان شنو يا ربي....
- يا زولة هووووي خطيبك ياهو داك امشي عليه انت المسلطك علي منو..
- خلاص بننتظرك مع عوض يوم الجمعة اوكي...
- ربك يسهل
ودعنا البنيات ومشينا علي امتدادنا نشوانين...
ومن غبانا نسينا انه بعد شارع 61 مفروض نمشي بالجهة التانية من الشارع عشان كتيبة الجيش...
وبس نصلكم جنب باب الكتيبة ونسمعلكم: ثااااااااااااااااااااااااااااااااااااااااااااااااا ااابت
عوض من الخلعة انبطح في الواطة كله كله... وانا عيوني بقن يشوفن يمين بس زي الزول العنده قطيعة...
ورجليني يرجفن علي ملاية العنقريب وكتين يكون ضاربها الهنبريب...
وبي شوية صوت مبحوح كدي قلت لي عوض: خلاص رشانا... لحقنا أمات طه...

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 3:59 pm

more_horiz

(38)
يمين من الخلعة الدخلت فينا ما قدرنا ننطقلنا حرف
- شنو يا شباب ما عارفين الاقتراب ممنوع هنا
- ايي الشيب اليملأ راسك كان طيرتنا شوية الريدي في الراسنا
- (يضحك) ريدة شنو يا زول وانتو جايين من وين ذاتكم
- ياخي نحن حابلنا بنات وجايين مفرهدين ونتخوجج علي جيت
انت بي كواريكك دي حشيت قلوبنا حش بالخوف الله لا تكسبك
- (ميت من الضحك) يا زول هوي دة كلام شنو دة
- ايي شنيني ام قرينات شوف صاحبي دة رقدتو خل كيفن وجسمو كله جاري موية
والله يستر علي البنطلون لا يبقى سوالو فيهو شي..
- خلاص امشو يا شباب بس تاني ما تقربو من هنا
وصلت البيت اخدتلي دش وجريتلي وصلي ألت كهربة وجبتلي مسجلا محسكن كدي
باب ما فيهو ووكنين تطلع منه الشريط يجيك ناطي زي بزقة السفة كدي
وختيت محمد كرم الله:
وكت السمحة في هيبات تتجلى
تراني حلفت بي الله
تشيل خطواتها في ايقاع وحلات ايدينها تدلى
تودي صديرها قدامها تخلي سبيبها يتدلى
تخلي الدارة فوق نيرانها تتقلى
طبيعي غزير لا باروكة لا تلا
كانه حرير وكاسيهو السواد حلى
......
قليبي انا اباها مشغول ديمة يا خلا
اقولو خلاص نخليها يقولي هي نان بتتخلى
اقولو كفاك تبل الشوق وهو شوق الجن بتبلى
تعال يا بدر عاين بدرك الهلا
..........
مغستني يا محمد كرم الله هريتني هري الله لا تكسبك..
غناك أماني ماهو سمح..
ـــــــــ
- امي (رحمها الله) يا ود انت مالك ماجيت داخل اكلتلك شي
- يمة ماني دايرلي اكل شبعان
- قوم ان بقيت ماك داير الفول ولا الشعيريي اقدحلك بيض
- يمة بيض شنو في الليل دة
- انت اصلك كنت وين
- مع عوض
- انا مشيك مع عوض دة ماهو عاجبني وكلما تمشي معاهو تجي ملبش
ماني عارفي قاعد يوديك وين...
- يمة وحاتي عندك مافي شي بس فتران وداير انوم
- الداير ينوم بيشغل محمد كرم الله
-(ضاحك) يمة انت مالك مزازاني بناتك لا جوة امشي اتونسي معاهن
-والله يا ابن الهرمة ما بخليك واوعك تخت في بالك شيت عوض دة
صحبك مجنون وامه مجنونة اكتر منو.
- ما ياها صاحبتك
- خرفت علي كبرها اسويلا شنو...

امي دخلت لي بناتها لااااجوة وخلتني مع محمد كرم الله يدودر فيني
السماء صافي والنجوم تلعلع فوقها والقمر نورو باقي....
يا ربي هسي انا اقبل وين....
البنييي دي وحات الله سماحتا تخلي الزول يغبي وفوق دة ودة رايداني
وامي تقولي خلك من شيت عوض دة...
عوض ان بقا ما عرس البت دي تراهو حاول وبلى شوقو من ريدها..
الباقي علي انا زي المشتهيلو مديدة تمُر ومنتظر اخواتو ينفَسِن...
لا نفسَن لا لميت في المديدي....
....
عوض جرا سلك الباب وجاني انتنى معاي في السرير...
- طارق باقيلك الزول دة دايرني في شنو وعايزني اجي بدري..
- انا شن عرفني بيه الشي الغليد علي شجر شارع النيل دة
- ياخي والله انا راسي ضارب خلاص
- اصبر لامن تمش وتسمع كلامو وبعداك شوف الحاصل شنو واتصرف على أساسو
- أنا باقيلي عايز يودرني وشايف القصي بعيدي علي بتو تنتظرني
- انت كدي ما تسبق الاحداث انتظر وشوف بعد بكرة حا يحصل شنو
- ياخي كدي فكر معاي...
- اييي افكر معاك شنو.... انا غرقان لي روحي دي وماني عارف نفسي ماشي علي وين
- (ضاحكا بشدة) باقيلي وِكِر لي سبيب راسك
- اييي خلني.. انا شيتي ما بيتعدل ضُمة ضُمة.... الكلام انت
- كيف الكلام دة
- خالتك عشة جات هسي وقالتلي كلام زي حناضل القيزان والشي الشايفو انا
اكمد حاجاتي في صدري واموتبها... اقلك شي جُر العنقريب داك وارملك فيهو
مرتبة وشوف في سماء الله ولا يوم الجمعة بتتحلا...
ونواصل

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 4:00 pm

more_horiz
(39)...........

يوم الخميس بالعصريي دخلت عند ناس عوض لقيتو راقد فوق عنقريب
وحالو مايل كدي ومدلقن علي الحلاوة البيمعطوبا الشعر وكتين يكتروبا
المعطي وتبقي نايصي كدي...
- يا خرابة مالك ما مرقت لااابرة نتمرن ولا نشوف في الكورة
- ياخي والله هامي من مشوار بكرة دة
- انت لليلي تهضرب ياخي امشي عادي وربك بيعدلها
- شنو امشي عادي دي انت ما ماشي معاي
- انا فوق شنو
- خالتي سكينة: النبي يا طارق بكرة تكابرو وتمشي معاهو
- ام سفي بكلملك جبيرين
- بري مالك علي... لكن امشي معاهو
- هسا انت جايبي بخور تيمانك ومخبرك دة لي شنو
- يا ولدي دايري ابخرو حالو ماهو عاجبني
- انت باقيلي جنيتي ما ياهو دة كويس وسوالو جضوم
- قول هو الله احد منك
- كدي خلك من جني باكر امش مع اخوك لا تخليهو وحدو
- سمح لي باكر يحيوا ناس ويموتوا ناس
ّ....................

قمنا الصباح اخدنا دشنا واتمرنا ومشينا علي العمارات
دقينا جرسنا الحبشيي فتحتلنا الباب ودخلنا..
ابو البنيات قاعدلو مع راجلا كدي شعر راسو ممعط علي
حوض البرسيم العارت فيهو حماري وليه شنبا افراق افراق كدي
علي المكشاشي الناصل منها خيط الدبارة..
السلام عليكم
عليكم السلام اهلا يا دكاترة...
دنقرت علي عوض: انت السلام الليلي مالو ماهو ياهو كدي...رسمي
- طارق روق
- دة عم ناس سحر بتكونوا شفتوهو يوم الخطوبة
يا ود حسونة
اتفضلوا
شويتين جات ام البنات: اهلا بالشباب
وعليكم السلام
مرتا ماهلي كدي وحديثها طاعم ودايما تلمع...
في غبار في كتاحة هي دايما وشها زي الرخامي يلعلع
اتفضلوا لي جووة
دخلنا لقينا خالة البنات حنان ومعاها شافع كدي سلمنا عليها واتحكرنا
- كيف يا شباب وكف ناس الامتداد
- ما عندهم عوجة تراهم عايشين
- د.طارق حا تبدأ (تضحك)
- لا لا ها سكتة
- تعرف الليلة سحر مصرة انه الفطور يكون قراصة عشان انت بتحبها
وااااضيقي انا بدينا
- معليش شوية ملخومين عشان سندس بت اختي حاملة وشكلها حا تلد الليلة
- اخدو راحتكم وربنا يحلها بالسلامة
- لا هي كويسة متابعة عند تادرس
دنقرت علي عوض: تادرس دة شنو يا صيدلي كبسولات استروجين جديدة ولا شنو
- طارق عليك الله روق تادرس دة اخصائي نساء وولادة
- (تتبسم) قاعد تقول شنو يا دكتور
- لا مافي شي... والداية جبتوها
- داية شنو ياخي حا تلد في الراهبات
ابيت اسأل من الراهبات دي شنو بس خمنت كدة انها عيادة ألت ولادي
- اي كان كدي نص عمرك ضايع
- كيف
- اصلك ما حضرتي ولادة في البيوت
- لا لا
- ولا شفتي ولادة الحبل
- سجمي حبل شنو كمان
- عوض قوماك من هني ديل ماهن عارفين ولادة الحبل عرس شنو العليك
- عوض ميت من الضحك: طارق بطل الجن البتسوي فيهو دة
- كدي احكي لي ولادة الامتداد كيف
تعرفي اسماء اخت عوض وشافعها خالد
- كيف ياخي
انا بحكيلك ولادتو كيفنها:
يوم ونحن صغار حريم الجيران الكبار اتلمن في بيت ناس عوض يغنن ويسفن في التمباك
ونادو زينب الداية وهي زاتها تسف معاهن وجات شايلالا شنطتا ألت نيكل كدي عاملي زي
كلوة الخروف مقوسي كدي وفيها مقصات وشيتا كدي مانا كنا فارزنو...
المهم الرجال قاعدين برة في النيمي ونحن ندخل ونمرق... أكان نشوفلك اسماء دي
تكورك والنسوان يقولن ليها اتمشي وهي تغزغز في يدينا في ضهرها:
يا الله لي
يا الله لي
ومرة مرة تمسك في حبال الغسيل وتتلف بي الملايي
واي يمة
وووب علي
يا الله لي
ومرة مرة تعضعض في الهديمات المنشورات
والداية تجي تقولها كلاما كدي ماهو مفروز
وتمشي تاني تغني مع النسوان الكبار:
بكريلو بالوليد
يا السمحة ام نهيد
يا السمحة حد الريد
وفجأة تسمع اسماء كواريكا يجيبن الفي الخلا
والداية تقولهن دخلوها لاااجوة خلاص وحصلوني بي الموية السخنة
وفجأة تشوف حرم دخلت عليهن شايلالا حلة بوخا طالع
ويقفلو باب الاوضة وشبابيك الخشب
وبين الهرجي أليل النسوان تضيع كواريك اسماء
وفجأة تسمع صوت الشافع يكورك وضلفة الشباك الاخضر الفوق
تتفتح وتسمع صوت رقيي: يا طارق اجر علي محمد وقوله جابولك ولد
وانا اطير علي الرجال في النيميي واقولهم اسماء جابت ولد
يقوموا يباركوا لي محمد ويديني شلن (خمسة قروش)
وارجع القاهم بيوزعوا في الحلاوة
واريتا حلاوة عدوك يمين تتلصق بين فكينك وتبقى تناتل فيها فشان تمرق
تقول عاجننها بي صباع امير... يمين حنكك وكتين تنتهي منها لامن يقع
من شدة المناتقة...
- ميتة من الضحك معقول الكلام دة... يا سحر... سحر تعالي
وامغستنا مالك علي مناداها من هسي

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 4:01 pm

more_horiz
40)

البنيات جن داخلات ونايرات والايدين مفدعات لي وراء
صلاتي علي محمد..
جكس عوض: اهلا بالشباب
- يا مرحب كيفكم
- سحر: كيف عووضة هلا يا دكتور
- اهلا سحر
وحاتكم ايدي وكتين طقشت ايدينا يبست ضُُمة ضُمة
الشعر الليلي ضافرنوا ضنب حصان ويتمرجح من الكتف دة لي دة
وانا ازوزي معاهو بس درويش في حلقة ذكر
عوض بنيتو قعدت جنبو وسحر جرتلها كرسي قاصدتني
اخدتلي عيينيي لقيت الفستان حدو الركبة
يمين الرجلين علي عود الابنوس يرارين
- خالة البنات:هسا خالد دة ولدوهو في بيت ناس عوض
- ايي واللذيذي حبوبة عوض كانت نايمي وقامت مخلوعي
لمن سمعت الكواريك قامت مهجومي: انتو الفي شنو
- اسماء عايزة تلد
- الله يقلعها هجمتني هي وكتين ماها قادري علي الولادي
يوما داك ما تشوفلها اوضتا تاني تمشي عليها
خالة البنات بقت تزح من الضحك
جكس عوض ميتة من الضحك ختت وشها في كتف عوض: صحبك دة مجنون
- عوض: انا قلتلكم ماهو نصيح
سحر خجلت وختت يدينها في وشها ودنقرت علي ركبتها
الضفيري جات واقعي علي صدرها
يمين الرقبة علي برطمان المربة البيختو فيهو الكركار داك
تلمع ومتواسي وناعمي... شفت فيها وعاينت علي رقبة عوض
عضامها كلها ناطي علي تروس الجربكس... والعجب وكتين رجعت تاني
علي ضهر الكرسي والصدير قام معاها...
انا اصلي بقيت آآآبشوف غبيت كله كله
وصوف جلدي كله قام وما لقيتلي ريقا ابلعه
الله يقلعك يا عوض كان هريتني معاك
- خالة البنيات: لكن يا دكتور والله عندكم حاجات عجيبة خلاص
- ايي نحمد الله ما عندنا شي غير القرقراب...
نضحك ونصوتلنا سخيني ولا حرف أليل قراصي نلوغده ونتمه كوز مويي من الزير ...
مافي شي تاني... لانا عارفين الدنيي حاصل فيه شنو ولانا مدنها خبر...
نتلابس في الهدوم والشباطة.. والدنيي ماشي... بي هني ماشي وبي عندنا كمان ماشي...
راضين بي قسمة الله ومتيقنين...
- سحر: لكن يا دكتور حياتكم حلوة ما فيها عقد
- نان نعقدها اكتر من ماها معقدي نوصلها وين عاد
- انا قصدي انكم ماخدين الحياة بي بساطة وما عندكم برتكولات لا شي
- اييي برتكول شنو.. هو نحن وكتين ندخل علي بعض
بالله تجر سلك الباب وتلقى نفسك في وسط ناس البيت
- ام البنات: يلا يا شباب علي الفطور ان شاء الله يعجبكم
دخلن علي الصفري اكان القالكم السراويس ألت القراصي من الصيني ومغتية بي شيتا شفافا كدي
قالوا فشان تبقى سخني ما تبرد...
ماهن عارفين هناك بالله نقع لغفي في صحن الطلس حتى ان بقت مولعي علي جهنم..
والعجب البصل اللخدر والقرشي أليلو ومعاهو شطي خدرة... ومخاخيتك تتسايل
كملنا فطورنا ورجعنا لي اوضتنا عاينت بالشباك اشوف في شغلنا
البلاط نضيف والنجيلي خدراء.. قبلت علي عوض
- انت يا جنى هسي بنيتك دي ان بقوا دايرين يدخنوها يدخنوها وين
ماني شايفلي حفري بايني في حوشم دة ووشها علي قعر الصاج
والدلكي ان بقوا دايرين يكفوها وين يلقولم حفر مع البلاط دة
ترا الضفر بينضفوه في التكل علي وين يكسرولم طلح مع البلاط دة
وناسك ديل ماهن ناس كركار شي... نحن بالله ألاتنا بعد الساعة تمانية
تلقاهن منجعصات في الشملي والدخاخين قايمي ونور الحيشان مطفي
وبرطمان الكركار جنبهن وتسمع في: يا محاسن اتمسحي الطلح بيشقق جسمك
... والله يا زينب عضامي كانن ينتحن بعد اختلي كبي انجميت... كيفن
آبتنجمي يا بت امي وكمان طلح محمد العربي دة سمح خلاص... ايي ما ضارباهو
المطري وبيولع سريع...
- عوض هسا انا في شنو وانت في شنو
- مالك الصايدك شنو
- شفت عم البت دة مصنقر الليلي من اصبحت وقلبي ماكلني
- يا زول خت اليقين في قلبك آبيحصل شي
شويتين دخلت سحر صينية الشاي وتبعنها الخالة والأم وجكس عوض
- خالة البنت: انا سمعت كلامك يا طارق وكتين نبقى علي الطلح بنعرف نسوي شنو
- سجم خشم امي (رحمها الله) انت سمعتيني
- ايوة سمعتك وانا واختي ضحكنا... شكلك كدة ما ساهل
- ان ما متنا شقينا الترب
- جكس عوض: عوض بعد تشرب شايك بابا قاليك مر عليه في الصالون
يا ربي تستر

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 4:01 pm

more_horiz
(41)

عوض كمل شايو ومشى علي محكمة المظالم ديك... والله وحده العارف الراجيهو شنو بي هناك...
- سحر: يا دكترة انت طبعا ما بتشرب شاي عشان كدة انا جهزت ليك عصير المنقة البتحبو....
- جكس عوض: بختك الناس ماخدة بالها منك..
- سحر زولة حلوة ياخي وانا بحب الزول البيهتم بالتفاصايل دة
- لكن يا دكتور انت ما حصل سألت نفسك الزولة دي ليه مهتمة بالتفاصيل حقتك
- هيييي انت جكسيك مشى علي ابوك وجيتي تهريني بي هني
- (ضاحكة) ياخي كدي خليني أسألك بي طريقة مباشرة: أنت عندك حاجة ما عاجباك في سحر ولا عندك ارتباط تاني وما قادر تقوله لينا
- لا دة ولا دة أها شن قولك
- طيب ممكن اعرف انت ليه متحفظ... تعرف انا بشوف نظراتك ليها من بعيد والله يا طارق نظرات زول ريااااااااااااااااااد شديد ومكتول عديل هههههههه.... بس حيرتنا معاك
خفت يا الحباني لساني يغلبني وأقولها والله رايدها لامن واقع علي قفاي... واصلو ان بقى لي قلبي وحات الله يبق بق بي اسمها ليله ونهاره.... ووكتين اشوفها ولا اسمع صوتها حيلي يموت ضُمة ضُمة... والعجيب وكتين تغمد عيونها وتفتحن تاني والبياض الفيهن يبقى اكتر من السواد.. اصلي بس اقعد اعضعض في لساني وألولو فيه علي سمكة القرقور في السناري وكتين يطلعوها من المويي... والعجب وكتين تكون هاجرة نصها بي حزاما عريض كدي والشي التحت الحزام يتمايل مع مشيها من هني لا هني... وانا زاتي أزوزي معاهو متل البومة الشايفالا فار ورويسها يزازي معاهو....
- يا بت الناس انا ماني قاعد اشوف تحت رجليني... انا بشوفي لي بعيد.. واختك دي ان بقيت قلتها بريدك... ياني الاتورطت والله قال بي قولي... انا ماني قاعد اريد الخنقي... حتى ان بقى ماتلنا زول انا تلقاني آخر واحد ابكي واطمن نِفيستِي إنه لسة عايش... دحين اختك الله بيسألني الما يريدها ماهو نصيح... بس علي قول خالتي سكينة الناس وكتين كانت تلملم في القروش نحن ابهاتنا كانو مزازين الانادي والمريسي... وهسي واقفين علينا... ومستننا نشيلم ونربي باقي البُطان الصغار.... دحين باقيلك في الدوامي دي عندنا حلا لي حب ولا مستقبلا خاص... هاااا زولا هاااا قصتنا ماها بايظي من الليلي ولا من امبارح... وإن بقى علي القلب تراهو ممكون وصابر وأنا آآآبقدر اورطلي زول معاي في ظروفا متل دي... دحين ناري باكلها براي...
- لكن يا دكترة دي تضحية فوق التحمل... وانتو ممكن تمشوا الحاجتين مع بعض لو عزيمتكم قوية... ياخي الحب دة ما ممكن يكون دافع يخليكم تمشوا لي قدام...
- شوفي يا بت الناس... انت بتقولي كدي عشان في حاجات ماكي شايفاهن... هناك الدنيي ماها متل دنيتكم دي... الحياة واقفي وماها ماشي لي قدام كل شي بالصف... وكتين تكون طالع لازم تشوف برامج باقي اخوانك كيفن عشان ما تنطاقشوا في البناطلين والقمصان والشباشب... يعني الواحد فينا وكتين يكون عنده مشوار لازم يشاور باقي البيت في اللبس... ووكتين كنا في المدارس.. وحاتك ردا واحد وقميص ويحيد ومشيحيد تقومبو وتقعدبو والرجلين اصلهن بس تحشرن في «تموت تخلي».. تمشي العشش يفصلوهو ليك من لساتك العربيات القدام وتدخله في رجلك الدخلي الياها... يمين لامن سيورو تنطبع في قدميك... ووكتين تطلع رجليك بس فطيسي رسمي... أها دحين كان ما كانت القرايي مجان وحات الله يانا المدعوكين في البناء دة لامن تقوم قيامتنا... أها ناسنا ديل كبروا وراجننا نشيل باقي العتَّاب المكوم في بيوتنا داك... فشان كدي حرام تظلملك زولا معاك وتحشرو في جهنم ألتنا دي.... خصوصا ان بقى زولا تريدو وعندو عندك مكاني كبيري....
- بس يا طارق كلامك دة هسي ما اعتراف صريح بالحاجات الجواك... حرام ياخي الشي الحلو دة كله يموت في ضلوعك انت براك...
- ياخي ما تجرجريني في الكلام... انا فضفضتة معاكي انت لانه غلبني اشيل الشي الجواي دة براي... انت وخالتي سكينة بس القلتلم الشي الماني قادر اقوله لي سحر....
- يا الله ياخي بس كدة ما كويس ياخي... قول ليها كلامك دة وريحها وخليها هي تقرر حاجاتها... يعني ما ممكن الحاجة تكون حقتكم الاتنين وانت تاخد فيها قرار براك.... كدة ما عدل..
- يا زولة أنا اصلي ما وعدتها بي شي... وأصلي ماني عندي شيتا اوعدها بيهو ولا شيتا اقدمو ليها... وان كان للألم أصلو ياهو أليلي تب.. قادر عليهو... لكن الماني قادر عليهو ... اخليلي زولا زين بالحيل متل سحر يتألم فشاني.. الدنيي دي مانا حارِلنا فيها شيتا نعيم.. وإن الله من كرمو لطف بنا كمان القسمي ألتو راضين بيها...
- طيب ياخي انت ليه ما داير تقول ليها الحاجة الجواك دي...
- موش أحسن من اعيشها في حلم مستحيل... واسببلها ألم وجرح..
في اللحظة دي دخلت علينا سحر شايلالها صيني فيها جك أليل منقي وكبابي.. وكتين ختت الصيني في الطربيزة ومالت فشات تقعد... شفت رُكْبينَها... الله بسألني تقول ما فيهن عضم... يشبهن المخدة وكتين يكونوا يا دوب منجدنها... وين لي ألات عوض عاملات علي رأس الكُنش كدي... الله بسألني يا جماعة عندها وجنتين علي زبادي «الدانيت» البجيبو اعلانه في الام بي سي داك... تسكت تمطق وانت تشوف فيهو..
جكس عوض دخلت لاااجوة.. وسحر جرت الكرسي وقربت مني... وانا شلتلي مخدي من السرير وختيتها في رجليني وهجرتها علي صدري... فشان ادس النتلي أليل قلبي..
- عجبتك المنقة يا دكتور
- تسلم يديك ياخي... حلوة شديد
- عوض ما جاء
- والله ما ظهر... خير ان شاء الله مافي عوجة
- ما عارفة بس انا مقلقة وعمي دة بالذات ما قاعدة اريده
- ياخي موش يمكن تكوني ظالماهو
- لا لا لا اصلو من يجي ويقعد مع ابوي كدة براهم بعرف انه في حاجة في راسو قاعد يقنع ابوي بيها... ودايما بتكون مصيبة... وهسي حكاية ينادوا عوض دي براهم الله يستر فيها...
- ما اظن في حاجة تخوف..
- الله يستر... عشان كدة انت ما عايز تقول حاجاتك...
- وكتين تكون حاجاتك جواك وماك قادر تقرر فيها... او يكون قرارها عند ناس تانين او في علم الغيب... شن فايدتها..
- ياخي انت ليه متشائم كدة... اعمل اي حاجة.. قول اي حاجة..
- القول عندي يا بت الناس التزام... وانا ماني قادر علي التزام ماني قادر اوفيهو....
- طارق (الله بيسألني لمن نطقت اسمي دة زي الكبوا فيني موية مسخنة اضنيني حسيتبهن تقال ومسخنات... وحيلي مات): ياخي انا عايزة اعرف حاجاتي ماشة وين... انا لا قادرة أطمئن وأخطط.. ولا قادرة ارمي القصة كلها وراي وامشي...
بعد تمت كلامها ده شالت يدينها وغتت وشها... وحسيتبها متوتري ودايري تبكي...
والله يا الزينين لا عرفت اقولها بريدك... ولا اقوم اضمها لي صدري واعوعي... ولا اقعد تحت رجلينها واخت يديني في ركبتها ووشي فيهن ولساني براهو ينطق: بحببببببببببببببببببببببك

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 4:02 pm

more_horiz
42)

البنيي سكتت ودنقرت... وانا الكلام كمل في حلقي... طبقت يديني بين رُكَبي واتمحنت.. الله بيسألني العرق نازل من يديني زي نقاع الزير.. هسي يا ربي انا اسوي شنو... يا رب انت من صفاتك العدل... دحين حلني... يا مالك روحي حل عقدة لساني... ولا كمان حلني وخلني امشي لي أهلي...
ربكم رب الخير عوض جاء داخل... ووشو مقلوب ينعل قفاهو وعيونه محمري.. وينفخ في جضيماتو العلي السعن ديلك... انا زولي عارفو.. وكتين يكون ممكون ياها دي حالتو...
- طارق نمشي
- سحر: ياخي مالك مستعجل يا دوبها حداشر ولسة بدري علي الصلاة.
- عوض: ياخي يا دوب نمشي نستحمة وانتو ذاتكم تمشوا تشوفوا بت خالتكم...
- جكس عوض: شنو البسمع فيهو دة.. ماشين وين ياخي.. بعدين انا موش قلت ليك عايزاك..
- ايوة بس الوكت اتأخر شوية
- كدي تعال انا عايزاك
جكس عوض ساقت عوض ومشت لاااجوة.. وسحر قبلت علي:
- صحبك مالو
- والله ما عارف.. بس هو لمن يكون زعلان ما بيحب يتكلم، وشكله كدة في حاجة ما مرتاح ليها..
- انا ما قلت ليك.. عمي دة غير المصائب ما بتجي من وراهو حاجة
- كان علينا نحن متعودين يا سحر.. الحزن دة بقى ساكن رسمي في بيوتنا، حتى ان بقى مشى بنستغرب موش بنفرح...
- ياخي انا ما بحب نبرة اليأس العندك دي
- دي ما نبرة يا بت الناس، دة واقع نحن بنعيشه بشكل يومي... اقدار ربنا صعب نهرب منها... عشان كدة انا كنت رافض الموضوع دة من اصله..
- يعني انت برضو عايز تكتل مشاعر الناس ديل زي اعمامي
- انا لو علي عايزهم يتزوجوا من بكرة... يا بت الناس انا بقول كدة لانه بشوف الشئ الحوليني كويس.. الحب من غير قراءة للواقع بيبقى حلم صعب تحقيقه وألمه حا يكون أكبر بكثير من لذته...
- يا طارق أنا لمن قابلناكم حسيت انه الواحد لمن يكون عايز حاجة بيصل ليها.. انتو كنتو بالنسبة لينا أمل كبير خلاص... ممكن تقول قدوة عدييييل.. طلبة جامعيين وشغالين طُلب عشان يحققوا حاجاتهم.. ودة الشي الخلا اختي تحب عوض.. هنا أي نعم كل شئ متوفر بمقاييس القروش... لكن في حاجات كتيرة ناقصانا أقلها كيف نختار حياتنا بنفسنا... عشان كدة لمن اختي اصرت علي عوض ووقفت قدام البيت كله حسيت اننا ممكن نعمل حاجة.. ممكن لأول مرة نقول لي ابوي واعمامي نحن من حقنا نختار... انا ما عايزة يزوجوني زي بنات عمي ياخي...
- يا الله ياخي... هنا وهناك نفس الشئ.. الألم سيد الموقف مع اختلاف اسباب هنا وهناك... تعرفي انا بعجبني جدا الونسة معاك بحس كأنه بتكلم مع زول بعرفه من سنين طويلة شديد... زول كدة لمن تقعد جنبه تنسى الكون... لكن.... ياخي نادي عوض خلينا نمشي
- دة اعتبره نوع من الهروب
- يا سحر... يا بت العمارات... انا ما عندي حاجة اهرب منها... انا بحاول اهرب من جواي... بحاول ابعد عن نفسي عشان اقدر اعيش، الجواي كتير وما عايز اجري وراهو عشان احققه... لانه ما بيتحقق..
- أول مرة احس بالمرارة الجواك دي... كنت دايما بحس انك مقبل على الحياة بتضحك من جواك...
- بضحك من جواي يا بت الناس عشان ما اطرشق... عندي احلام كتيرة ما قادر احققها... والحياة اهي ماشة.. والمسافة من الامتداد لي مقابر الصحافة ما بعيدة... عشان كدة لازم اضحك واقرقر... انت زولة كويسة يا سحر... وجواك كمية من الحلم والأمل ممكن لو بذلتي مجهود بسيط انا متأكد بتصلي... ما زينا نحن..
- اصل بدون مقاديف... واصل لي منو؟؟؟؟
- المهم انك ما ترجعي وراء... انسي الامتداد.. فوتيهو وحا تصلي
- حتى لو كان الامتداد دة المحطة الانا عايزاها
وحاتكم لمن قالت كدة... جسمي خدر... واتذكرت انه دي السنة الاخيرة لي في الجامعة... وطريت اغنية حميد:
حان الامتحان من وكتو بس فاضل شهر
وما اظني من جور الزمان انجح واجيب ليكم نمر
زينوبة كر من حالي كر قاعدلي في قيزان جمر

وقفت علي حيلي وجيت ماشي مسكتني من يدي زي الضربتني كهرباء:
- طارق ما عارفة بس عليك الله ما تسافر قبل ما اشوفك
- إن شاء الله قولي يا رب... نادي لي عوض
عوض جكسويتو جات ماسكة في يده وبتنقنقلو تحت اضنينو... بس هو سارح.. القصي باين عليها كبيري...
ودعناهن ومشينا علي أهلنا كداري لا ناضمني لا ناضمتو...
استحميت ومشيت الصلاة لقيت عوض خاتي مصلايتو وكتين شافني قلبها وقعدت جنبو وطبقنا سفنجاتنا بي ورانا.. والواطة حر وسمومها لافح... وبدأت الخطبة... الله يرحمك يا العباسي امام الامتداد.. كانت الخطبة عن عذاب القبر... قربت امشي اقوله ياخي عذاب القبر دة خلو ترانا ماشينلو ماشينلو... كدة خلنا في عذاب الدني دي...
كملنا صلاتنا عوض قام قبل ما يسبح وخلالي المصلاية ومشى...
مشيت البيت اختلي غمدي واتغديت وصليت العصر ومشيت علي بيت ناس عوض... لقيت خالتي سكينة في مصلايتها تصلي جريتلي بنبر وقعدت جنبها.. بس مع السلام عليكم السلام عليكم قالتلي:
- طارق ناولني حُقتي
- انت اصلك لا تسبحي لا شيتين طوالي علي الصعوط
- أي كدي أدني اللسف ياخي هو الله دة الماهو عارفه شنو فشان يوروهو ليهو
- انت باقيلي جنيتي
- أييي جنيت وكتين سمعت كلامك ومشيت خطبت لي صحبك
- هو وينو ماني شايفو
- ابى يتغدى وبس ساكت لبس سفنجتو ومرق.. يا ولدي انا قلبي ماكلني عليهو يا وليدي امشي شوفه وين...
- ما تهمي شي انا عارف بلقاهو وين...

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 4:03 pm

more_horiz
43)
من دربي داك مشيت علي المظلة الفي شارع الصحافة شرق..
ياها بُكانا وكتين تضيقبنا.. وكتين نزعل نمشي نقعد فوقها ووكتين نفرح نتوهط فوقها.. ولفت علينا وولفنا عليها.. فيها قرينا (ماجدولين) واستمتعنا مع (مصطفى سعيد) وحبينا (البحث عن وليد مسعود) و(مدن الملح) و(مائة عام من العزلة).. ما خلينالنا شي ما سويناهو فوقها حتى القرايي سويناها هناك... تمرين 23 بتاع حساب المثلثات الصعب داك حليناهو فيها... شاغلنا فيها بنات فاطمة عبد الرحيم رحمها الله... ووكتين مات صديقنا فتحي رحمة الله عليه بعد الدفن مشينا انا وعوض قعدنا فيها نبكي...
والقعدي فيها حسب الحالة.. وكتين نكون فرحانين بنمشي سوا ونحكي عن الشي المفرحنا... ووكتين نكون زعلانين الزعلان بيمشي عليها في الأول والثاني يبراهو...
وصلت المظلة وعيني لي عوض متشنقل وراسو متوسد السفنجات وكرعينو المكعوجات ديك تاكلِن في حديد المظلة علي المقصُوصة المعلقالا في مسمار في التُكل .. اصلي ما ناضمتو.. لقيتلي ورقة ألت فلسكاب جنبو وفوقها قلم بيق.. ومكتوب فوقها:
السمحة يا ست الخلوق
الدنيا من بعدك عذاب
لا حالفة يوما تحن
لا عايزة تسعدني وتروق
البسمة وحاتك غالبها المروق
والدمعة سايقاني سوق

ما قلتلو شي مشيت علي الكوشة القريبي ولميتلي علب ألات صلصة.. ومشيت رصيتن فوق بعض وجبت الحجار ختيتن جنبو وبقيت اشوف في الحافلات والعربات ماشي فوقنا وتنوني علي الجقور وكتين يكتشفلهن بُكان في المخزن فوقه عيش...
عوض قام يرمي في العلب بالحجارة ومرة مرة يشرد بعيد وعينو في الفسحي البين الامتداد واركويت (هسي اتملت ملي)...
- اسوي شنو يا طارق
- تسوي شنو في شنو
- الراجل دة قال لي بديك ستة شهور بعد تتخرج عشان تعمل العرس وتتزوج البت دي وكدة بكون ما قصرت معاك.. قال لي يا ولدي الناس اكلوا لحمنا وخطبتكم دي طولت وانا بقيت ما قادر اوري وشي الناس
- وانت قلتلو شنو
- هو ما اداني فرصة شان اقولو شي.. قهمني وكسر مقاديفي من الاول.. ومعاهو اخوه النحس داك..
- أصلك وقفت مبلم قدامهم وما قلت شي
- ياخي أقولك دة يشيل ودة يخت قبل ما افتح خشمي التاني ينط في حلقي.. لكن قلت ليهم انتو عارفين وضعنا في البيت وتاني ستة شهور ماهن كافيات فشان اجهز واعرس...
- اها..
- قالولي ما ترد هسي كدي امشي ورتب امورك وانت علي وشي امتحانات بعد تنتهي وترتب امورك تعال قولينا رأيك...
- طيب الجكس كلمته..
- ما قدرت... خفت عليها.. لو سمعت كلامهم دة بتموت...
- نان الحل شنو
- انت شايفلك حل.. القصي بايني ماها دايرلا درس عصر.. عمها دة ابو الولد الكان دايرها.. وهسي ضاغطين علي ابوها وشافوا الحِجى ألت الوقت دي عشان ما يكون عندهم ذنب ان بقوا فسخوا الخطوبة..
- طيب القول شنو... يعني إنت أكنو فهمك شنو
- انا ناوي اشوف خالتها عشان تدخل في الموضوع غير كدة ما عندي حل
- طيب والبنيي حا تعلقها كدي وما تقولها مالك مكوزم (مادي بوزك) كدي..
- والله يا طارق ماني عارف اسوي شنو حتى امي ما قدرت اقولها.. حاسابي بس ماني داير اكدر عليها.. وكتين اشوف في تعبها مقابلي اللقيمات والصيجان انعل ابو الفقر خصوصا وكتين يجي مصطفى اخوي ماشي ولابلسلو رداء مقدود ماشيبو المدرسة وتمسكو امي كل يوم تخيتو ليه وتاني يتفتق... باقيلك دي حالة ألت عرس.. افوتهم امشي وين ومحمد اخوي الحمل تقل عليه والمسكين لاهو قادر يتكلم لاهو قادر ينقنق وانا جيت وسويتها خطوبة وعرس وحب وجن...
- ياخي بتتيسر لا تسدها في وشنا... هسي انا قاعد اقول انت حا تفتحلنا النفاج نطلع من الفقر دة...
- يا زول نفاج شنو.. انا باقيلي دة زردوية ألت مشنقة وياني الحا افطس فيها واحتل ضُمة ضُمة..
- إني آمنت بالله يا زول اليشوفك متحنبك وكتين كنت اناضمك زمان ما يشوفك هسي... ياخي مشيت الصعب وفضلك الساهل..
مالك داير تتجن في آخر الطريق...
- طارق جبريل.. القصي بقت ماها ساهلي.. كفتين محال يتعدلِن.. يا أهلي يا العرس.. يا اما انساهم وامشي اشوفلي طريقة اعرس البت دي يا كمان اكمد المغصة في قلبي واشتري أهلي.. دا الشي الشايفه أنا وماني شايف غيره هسي... تعرف قبيل كنت بسمع في اغنية شادية:
شادية ما عارف ألت الله تراني بزرع
دحين من هني لامن اتخرج يحلها الف حلال... وتراني بزرع...

descriptionاروع قصه سودانيه - صفحة 4 Emptyرد: اروع قصه سودانيهالجمعة يونيو 12, 2009 4:04 pm

more_horiz
44)
ونحن قاعدين ممحنين كدي جات وقفت علينا علوية شمشرة:
- هوي يا اولاد قوموا خالتي سكينة تفتش عليكم.. انتو مالكم
- علوية... القصي ماها ناقصاكي انت كمان
- بري يا اخوي انا مالي خالتك سكينة شافتني ماشي علي الزلط وقالتلي ان بقيتي شفتي الاولاد ديل قوليلم انا عايزاهم.. عليك الله يا طارق الفي شينو
- عاد أنا فشان غتاتك دي آبولدك... يبقالك السم
- اصلك فقر من يومك... لا تقولي شي لا تناضمني
- انت اصلك جنك دة آبتخلي.. لليلي تتحاومي في الحلة زي كلب الحر وتفتشي للاخبار والقيل والقال
- النبي يضريك ويقيفلك تقولي الفي شنو... ياخي كدي بتخلي راسي يودي ويجيب
- عوض قوماك انا عارف النصيبي دي ماها نصيحي....
مشينا علي البيت لقينا خالتي سكينة ماسكي جرادلها وواقفة جنب الباب... شلنالا الجرادل ووصلناهن جنب الدكان وقعدنا جنبها مبلمين ضُمة ضُمة...
- عوض يا ولدي مالك ليك اكتر من شهر لا تنضم لا قاعد تقولنا مال... يا ولدي مالك داير تقصر عميري معاك... انا اتهديت يا ولدي.. وماني قادري علي وجع قلب من تالاكم
- عوض: يمة مافي شي بس الامتحانات قربت ودي سنتنا الاخيرة.. ومقلق
- نان يا ولدي انت مفروض تفرح خلاص حا تخلص وتنتهي من اللت والعجن أليل القرايي دة.. بس ما اظن القصي ياها القرايي... القصي باقيلي فيها نصيبي في العمارات.. بس ماك داير تقول شي..
- يمة مافي شي قلنالك..
- طارق آآآولدي اخوك مالو... مالكم دايرين تكتلوني ناقصي عمر
- خالتي مافي شي... بس مهموم بالقرايي
- باقيلي متفقين... بس بيعفن وبينشم..
- خالتي قلنالك مافي شي... انا باقي عارفك وكتين تحكيها..
- اي كدي.. قوموا املولي حقتي صعوط من دكان المحسي
ما صدقنا قالتلنا كدي شلنا الحقة ومشينا علي دكان المحسي في مربع اربعة..
- عوض امك دي ان صادها شي انت السبب
- فشان كدي تراني مابي اقولها شي
- نان داير تدسو لا متين.. وهي قالتلك بيعفن وينشم
- والله يا طارق ماني عارف.. باكر عندي لقاء مع الجكس في اسكريم 41 ونشوف البيحصل..
- وووووب عليك عاد... انا اصلو لا تقولي يلاكا ولاني ماشي من جهتها العمارات دي
- ههههههههه والله سحر جاية مخصوص عشانك
- ياخي مالك داير توجع مصاريني
- والله ضربت قبيل في دكان الهادي وقالت لي جيب طارق معاك
- ان شاء الله تجيك حمى انت... يا زول اختاني
- هههههههههههه نان انت اصلك قايل نفسك ماك وكران معاي
- يا زول هوي انا لا قلت لي بت بحبك لا التزمتلي بي شي.. خشمي وماسكو عندي
- طيب لو هي قالت ليك بحبك حا تسوي شنو
- حباك برص انت وهي... انا من غير قولان اتهريت ورقدت خل... والله يا عوض البت دي وكتين تغمض عيونها وتقول لي: يا طارق... وحات الله انا اصلي لا بعرف انا وين ولا قاعد اقول في شنو ولاني كمان بقدر اشوف في عيونها... اذتني ياخي الله يعلم..
- طيب مالك متجنن..
- عوض زمااااان قلتلك القصي ماها لافقي يا الحبيب... ياخي شوف بس في وشوشنا اللافحها السموم دي.. يمين اتحرقنا رسمي... وشوف في جضيمات البنات ديل... يمين منديات علي نقاع الزير ياخي.. انا مرات يقولي راسي أتبِن جُضُم سحر دي... النصيبي علي البديفورد.. شكلها ناعمي...
- ههههههههه حرام عليك يمين نجضتها نجاض
- شوف يا ود امي... انا ناسك ديل ماني لافق معاهم لا هم لافقين معاي... دحين الله يسهلك..
privacy_tip صلاحيات هذا المنتدى:
لاتستطيع الرد على المواضيع في هذا المنتدى
power_settings_newقم بتسجيل الدخول للرد