عم عبد الرحيم

عم عبد الرحيم
محمد الحسن سالم حميد

فتاح يا عليم .. رزاق يا كريم ..
صلى على عجل ..
همهم .. همهمات ..
حصن للعباد ... وهوزز سبحتو ..
ودنقر للتراب .. هم فوق هم همات ..
صنقع للمسا ..
وكان في الجو في غيم ..
وكم نجمات بُعاد ..
وكان الدنيا صيف ..
لا قالتلو كيف ..
كيف أصبحت كيف ؟..
لا لمسة حنان .. لا لمسة وداد ..
لا رمشة طريق من قلباً وفي ..
زي أيام زمان ..
أيام الدفي ..
وكانت ماها في .. كانت في المراح ..
شدتلو الحمار ..
تحلب في الغنم لي شاي الصباح ..
والطير ما نضم ... ما رسل نغم ..

عم عبد الرحيم أتوكل نزل ..
في المشرع لقى .. زملان الشقى
الجأ من الجريف .. الجأ من الجبل
عله الناس بخير .. صبح هاظرم
نقنق ناقرم .. غاظوه ونعل
وعم عبد الرحيم ما يخبر زعل ..
كل الناس هنا ما بتخبر زعل ..
تزعل من منو .. وتزعل في شِنو ..
كل الناس هنا .. كل الناس صحاب ..كل الناس أهل
والماهم قراب .. قربم العمل ..

الطاق اليطق عشت أبو الزمل ..
بالحالة العليك بالفال بالأمل ..
عبد الرحيم كُت فلاح في يوم ..
في أيدك تنوم .. على كيفك تقوم ..
لا دفتر حضور .. لا حصة فطور ..
تقرع بالقمر .. تزرع بالنجوم ..
لكن الزمن دوار آبدوم ...

وعم عبد الرحيم ماشي على الشغل ..
في البال القديم إتعارض تُكل ..
تنشايح جراح يا ..
كيف الغسل ..
الدِنيا أم صلاح .. تبدأ من التُكل ..
في حق الملاح .. في اللبس الجديد ..
في القصد القديم .. وبيناتن عشم ..
في الفرج البعيد ..

أمونه الصباح قالتلو النعال ..
والطِرق إنهرن ..ما قالتلو جيب
شيلن يا الحبيب .. غشهن النقُلتي والترزي القريب
بس يا أم الحسن ..
طقهن آبفيد .. طقن آبزيد ..
وإنطقن زمن ..
وإنطق الزمن لازم توب جديد ..
وبأية تمن ..
غصباً للظروف والحال الحرن ..
شان يا أم الرحوم .. ما تنكسفي يوم
لو جارتنا جن .. مارقات لي صفاح
أو بيريك نجاح .. ده الواجب إذن
وإيه الدنيا غير .. لمت ناس في خير
أو ساعة حزن ..

عم عبد الرحيم يا حر ..
ماك حر ..
ياريت التمر ياريت لو يشيل كل تلات اشر ..
ولا أيام زمان كانت ما تمر ..
كان ما جاك هوان وما لاقاك ضر ..
كان لا ضقتي ضيق لا اتغرغر صبر ..
لا شابيت غريق لا طوح فقر ..
وكان ما كان ... وكان اكسيكي در ..

والماهية أُف .. عيشة هاك وكُف
في هذا الزمن .. تُف يا دنيا تُف
يا العبد الشقي .. ما إتعود شكِي
لكن الكفاف فوقك مُنتكي
والسوق فيك يسوق ..حالك ما بتسر ..
إلا كمان في ناس فايتاك بالصبر ..
ساكنين بالإيجار لا طين لا تمر ..
واحدين بالإيجار ما لاقين جُحر ..
سعلتم الضراع والعرق اليخر ..
عمال المدن .. كلات المواني ..
الغبش التعاني ..
بحارة السفن .. حشاشة القِصون ..
لقاطة القطن .. الجالب الحُبال
الفِطن الفرن .. الشغلانتو نار ..
والجو كيف سُخن ..
فرقاً شتى بين .. ناساً عيشه دين ..
مجرورة وتجر ..
تقدح بالأجر .. ومرة بلا أجر ..
عيشن كم هو .. وديشن هانقدر ..

وناساً حاله زين ..
مصنع .. مصنعين ..
طين في طين وين ..
ما مرابه مُر ..
بارد همها .. لا يعرق جبين ..
لا وشاً يصُر ..
عين والله عين ..
كلها كمها .. وعزها هانقدر ..
في الجنة أم نعيم .. في الجنة أم قصُر ..
يا عبد الرحيم إلا وراء القبر ..
ويُلكد في الحُمار .. لا تسرح كُتر
فتاح يا عليم ..
وإن كان القفر يا عبد الرحيم ..
أشبه بالكفر ..

حيكومات تجي .. وحيكومات تغور ..
تحكُم بالحُجي .. بالدجل الكجُور ..
ومرة العسكري كسار الجبُور ..
يوم باسم النبي تحكمك القبور ..
تعرف يا صبي ..
مرة تلف تدور .. ولا تقول برِي ..
أو تحرق بخور ..
هِم يا الفنجري .. يالجرف الصبور ..
كل السقتو مات .. باقي على التمور
وأرضك راقدي بُور ..
لا تيراب وصل .. لا بابور يدور
ونقرط للحمار .. ونقريطة الحمار
لا تنسى النعال ..
الطِرقي .. الخضار .. اللبس الجديد
تسريح السفر للماشي الصعيد .. ماشي الديش نفر
والبال إشتغل .. والبال إشتعل بالآبى ما يعيد
الحول ما إشتغل ..
الغُبن الشديد .. السابا ورحل ..
الضيق المحل .. والفرج القريب ..
الجأ وما وصل ..
زي الحال ده يوم لا كان لا حصل .. والبال إشتغل

السكة الحديد يا عمو القطر ..
يا عبد الرحيم قدامك قطر ..
وسال الدم مطر ..
وطارت دمعتين ..وإنشايح وتر
يا طاحن الخبر ما بين القضا ومرحاكة القدر
الشهدوا الدموم .. والدمع الهدر ..
إيدهم في التراب .. والعين في القطر ..
عارفين الحصل .. عارفين في حذر ..
الخبر اليقين بوّخ وإنتشر ..
أطفال القرى وعمال الحضر ..
أدوه الطيور ودنو البحر ..
إنصاعد سحاب وإندافق مطر ..
عم عبد الرحيم في الشارع عَصر ..
لي تاله اليسار متفادي الكجر ..
دورية الكجر .. عربية الكجر ..
جفلت الحمار وطوّح زي حجر ..
وعم عبد الرحيم إتلافا القطر ..

فتاح يا عليم .. سال الدم مطر ..
جرتق بالتراب .. منشور بي كتاب ..
روشتة وجواب .. وماهية شهر ..
مفتاح آب غراب .. أورنيكين سهر ..
جنب لبدة الحمار مقطوعين ضهر ..
عم عبد الرحيم يا كمين بشر ..
صحي الموت سلام ..
ما يغشاك شر ..