يا حليل ايام زمان

العادات السودانية بعضها قد تـُرحم عليه ..
و بعضها يرقد ينتظر "المنية" في كثير من غرف الإنعاش و العناية المركزه ...

اصبحت الكثير من العادات السودانية لا تتماشى مع معطيات - متطلبات حياتنا اليومية "الحديثة" ..
الطيبة ... المحنة ... تفقد الجار ... حتي التشييع (المشى في الجنازة) ...
الحاجات دي كلها بقت "دقة قديمة" و الكلام عنها اصبح ضرباً من ضروب الخرف ..
لبس التوب إلا عند قليل من المتزوجات ...

الديوان ... "ما يستقبل الضويف فيه"
جيهو الديوان فراشو ..
و افرشو الفرشة الكبيرة ..
الاباريق و التباريق ..

حتي المسميات ... الفريق .... للحي .... للحارة ... "و يارمال حارتنا زولاً..."
دكان ....لــ بقالة .... لــ سوبرماركت .... ولووووووووووول يا عفراء مول ...

المجتماعات القديمة ذات الصلاة الحميمة و التكافل و التراحم ...
الغيرة علي بنوت البلد ..
إحترام المرأة لود البلد ..

اللبس المحتشم عند المرأة ... و عند البنت خارج البيت ..و اللبس الفضفاض ...

الرجولة .. شئ إفتقداناه في كثير من شباب اليوم ..
فنيلة "كت" .. بنطال ضيق .. ناصل ..
و نغمات موبايل تجعلك تتمني الإنتماء "ولو للحظات" إلي إتحاد المكفوفين و الصم و البكم ...

تسريحات .. حلاقات .. "اخر جدعة" ..
اسامي تخجل .. و المشى علي اطراف الأصابع ..
اكل اللبان .. و الطقطقة ...
طرق السلام و تشابك الأيادي ..
إطلاق اللحية بصورة "غربية" و ليس إتباع لسنتة صلي الله عليه و سلم ...
و الفاظ و لغات تخاطب ....

إحترام الكبير و توقير الصغير ..




عفواً ...
لا نطلب تهديم العمارات السوامق ...
ولا التخلي عن الأسامي الأجنبية ..
أو الرجوع إلي بيوت "الجالوص" ذات "الشِــعبة" -بكسر الشين-
و تلك الابواب ذات "الوكرة" الخشبية...

لا نطلب التخلي عن الديفريزرات و إستخدام "المشلعيب" ..
و اكل "الشرموط" المجفف منذ ايام علي "الحبل" ...

ولا نطلب اداء الصلاة علي "التبروقة" ... و إستخدام الأباريق "الحديدية" ..

ولا نطلب جعل الجلابية زينا الرسمي في المكاتب و المؤوسسات الحكومية ..
يابلدي يا حبوب ..
ابو جلابية و توب ..
سروال و مركوب ..
و جبة و سديري ..
و سيف و سكين ...





و يا ابو مروااااااااااااااااااااااااااااااااااااااااااااااا ا ....

<sup>حاله صعبه والله يا لقمان

اذا ده الحال يا دنيا عليك السلام

وعلي نيل بلادنا سلام

و شباب بلادنا سلام</sup>

عدل سابقا من قبل الريح قدوم في السبت مايو 10, 2008 9:01 pm عدل 7 مرات

لك الشكر اخي الريح ,,, وربنا يهون ومانشوف اكتر من كدا ... يارب,,,

يا حليل زمان وسنين زمان
ذى مبغنو ناس عقد الجلاد

الاخ لقمان الهادى كلامك كل حقيقة وواقعى لكن ياأخى كيف الرجوع الية مع العولمة
والتفتيحة الجديدة والآن صار كل شى ساهل !!!!!
1- بدل الشرموط بقى برقر
وبدل الابريق بقى حوض رخام
بدل التبروقة بقى موكيت والحمد لله البدلات كثيرة والخير باسط خلى الناس تتمتع
وتفرفش والزمن القديم الله لأعادة علينا

الاخ لقمان
المثل بقول الخلي قديمو تاه نحن الان نحسب اننا تايهين في صحراء الحياة المليئة بالمشاكل مع التقدم. فالتقنية الحديثة اصلا لولا الاشياء التي ذكرتها لما وصلنا اليها. حقيقة تعبير بليغ عما في المجتمع الان من ثقافات واردة الينا وغيرت مسارنا وهذه اكبر المشاكل اننا لم نقاومها بثقافاتنا الموجودة عندنا عندما اخترقتنا التقنية الحديثة
اخوك ودحمد

يابلدي يا حبوب ..
ابو جلابية و توب ..
سروال و مركوب ..
و جبة و سديري ..
و سيف و سكين ...

ود القبيله

بسم الله الرحمن الرحيم اخى لقمان سلم لسانك فعلا رجعتنى بذاكرتى لايام خوالى لما العشاء كان الام تقول ليك ارمى فى الحلة باقى الكسرة واتعشى او (درمش فى الحلة ) وطبعا دى كلمة غريبة جدا على كثير من الشباب بتاع اليوم وطبعا كلامك يالقمان لو سمعوه عجايزنا كان بكو وابكو بس نحنا مع تغير الحال يمكن نتاثر ونقول والله كان زمن زمن ام بيلو والبعض يقول ( البومة)
واخى العمدة لا اعاد الله زمن البدائية ولاكن نتمنى فعلا عودة الشهامة وراجل واحد يحكم الفريق كلو ومافى ست بترد على راجل وزمن المامون على بنات فريقو وزمن عشاى اليتما
وزمن المطر البخضر الارض وزمن ونسة القمرا وزمن طيبة النفوس ماشيلة من الجيران والحبان وياكفى البلاء ودافعو نحنا فى زمن الاب مقاطع ابنو والابن مضارب خالو والعم فالق ود اخوه لاكبير بيهدى ولاصغير بينهدى وان هديت الصغير بكلمة يتناولك الكبير بضربة وسبحااااااااااااااان الله
بس اول مرة يالقمان اعرف انك عجوووز لدرجة باب الخشب الاكرتو خشب والمشلعيب
:lol: ونتمنى الجميل من مشاركاتك وابداعاتك اخى لقمان والله الموفق وفى اماااااااان الله

اخي لقمان والله يحليل ايام زمان يازمن وقف شوي لم يلاقيك عمك يقوليك امشي جيب سكر من دكان الهادى انت تفرح

كل الشكر للاخوة في المنتدي ,, بداية أخي شمس الدين والاخ ابو عمار واقول ليك والله ايام زمان ما في احلي منها ,, نعم نحنا ماضد العولمة ,, ولا الحداثة ,,ولكن!!! نحن ضد انعدام المبادئ والقيم ,, وضد تلاشئ الرجولة ووووو....الخ,, وايضاً شكري لك ود حمد وايضاً ود القبيلة ,, وشكري وتقديري الخاص للخال هيثم حسن علي كلامك الطيب وانا ياهيثم ما عجووووز !! لكن مازلت متمسك بالاشياء القديمة ودائماً تجدني متابع ومواكب للاشياء التراثية ,, امبيلو - السحارة - المشلعيب - الريكة - القرقريبة - الوقاية - المحراكة - الشرقرق- السعن- وووو...الخ!! ولك تحياتي ود حداد واتمني ان نتواصل في مقبل الايام

الاخ لقمان تحياتي
ما حدث في مجتمعنا هو ليس الانسلاخ الذي تقصده والذي وصفته بالتغير الذي امتد وشمل حتي المسميات ... الفريق .... للحي .... للحارة ..دكان ....لــ بقالة .... لــ سوبرماركت ... وابو فرار للسحائي - دى مني انا - وغيره من المسميات التي ذكرت ولم تذكر ، انها ظاهرة اقتصادية يمكن وصفها بانها طفرة حدثت لمجتمع بسيط عاني من ويلات وضع اقتصادي متردي وكلنا نذكر شكل الحياة في النصف الاخير من القرن المنصرم والمعاناة الحقيقية من صعوبة توفر سبل العيش وانعدام ابسط مقومات الحياة الكريمة من علاج وتعليم ومواصلات وغيره ،،،،
هذا المجتمع المعوز المعدم تعرض لطفرة اقتصادية عالية احدثت تغيير كبيرعلي مختلف الاصعدة والانسان الذي تحدثت عنه شمله هذا التغييرباعتباره القطب الاساسي وحجر الزاوية فغير طريقة كلامه وعاداته الحياتية من مأكل وملبس ومشرب ومسكن حتي المسميات اصبحت (مودرن ) واكثر عصرية ، ولا اظنكم تقفلون اننا نسارع لنلحق بركاب عالم متقدم جداً ،
بالمناسبة عارفين انو السديرة اقدم من واشنطون ، واشنطون عمرها 100 سنة بس ، في زول عارف اول زول سدر وحط رحالو في منطقتنا دي سنة كم ؟؟ اكيد اكتر من 100 سنة
تقول لي سحارة ومرحاكة وقرقريبة حرااام عليكم ؟؟؟؟؟؟؟؟؟

الاخت ساره ,, حقيقة انا بحييك علي مداخلتك وتعبيرك بكل صدق في هذا الموضوع ,, ذي ماذكرت انا ماضد المواكبة ,, لكن!!! رايك شنو في الحاجات القالها هيثم ,,, انا ماقاصد نتمسك بالمحراكة والسحارة في حد ذاتها,, بس كنت داير اقول في الزمن داك ,,,اي ذمن الاشياء الذكرتها ,, الطيبة ,,وتفقد الجيران ,,والمحنة ,, والتواصل,, اين هذه الاشياء الان؟؟؟ وبرضو ياساره ياحليل ايام زمان ,,, مع فائق تقديري واحترامي لرائك ,,

نعم الاخ محمد الموضوع يحتاج لحلقة نقاش طويلة ,, نفتح الباب لكل الاعضاء حتي تعم الفائدة ,,, فلك الشكر والتقدير,,

هيثم ياتو البدرمش فى الحلة دا ؟؟ التحية ليك ولهيثم ولكل المداخلين علي هذا الموضوع والله زمان الدنيا كانت جميلة لانها كانت بسيطة ، بس نحن لم تطورنا ما حافظنا علي حاجاتنا اتغيرنا مع ظروفنا لانو -وذي ما ذكرت- انو مجتمعنا بسيط جداً نحن الان جيل واعي ومثقف ومتحضر ممكن نميز وعندنا القدرة علي التغيير وفرض النفوذ يعني ابسط حاجة ممكن نعملا نربي اولادنا علي القيم السمحة الجميلة الانعدمت .. التراحم .. التوادد .. صلة الرحم .. الخ
بس في رايكم :
من اصدر النعي علي ذاك الزمان ؟؟
من اصدر الذكري علي ذاك الزمان ؟؟
من ارهق الزمن المعاصر إجترار ؟؟
الابيات لهاشم صديق
سرورة احسن زولة

لقمان اولدى مالك علينا ذكرتنا ايام زمان

زمن كانت تعيش فيه المروءة والكرامة بعز وكبرياء زمن فيه الرجال كالاسود نهرتهم ترجف الاوصال متنمرين مكشرين كانهم في نزال
زمن كان الصبي منا يلف الحلة بيت بيت عشان حبة ملاح بنشاط الواثق من نفسه متسلحا بالالفة وبسلاح المحنة والترابط حيث لايجد الا مراده او الكلمة الطيبة طيبة اهلنا زمان
وشتان مابين الماضي والان الذى اصبح فيه العرى حضارة والصدقة والعون خسارة والمودة مصالح وتجارة والتعدى على حق الغير شطارة وياخسارة وياخسارة
ولكن الصحيح بان الزمن لم يتغير بل تغيرت الانفس والمفاهيم وماتت القيم والاخلاق بل قتلت وقتلتها الحضارة والعولمة ..

انها الحقيقة التي ذكرتها ,, وشتان مابين الامس واليوم .. اسأل الله ان تعود تلك الايام وتعود معها الالفة والمحنة والتواصل يارب,,

تحياتي لقمان،،،
بالاضافة لكل تعليقات الاخوة أعتقد أن في شعرة بسيطة تربط بين مصطلحين ، البقدر اميز بيناتهم اعتقد ان ح يكون قادر يتصالح مع نفسه في المقام الاول وبعدين مع الاخرين، وهي :

التمييز بين "الحضارة " و "المدنية"

سلاااااااااااااااااااااااام

ولي قدام،،،

تحياتي لك اخي ابو مأب .. اصبت عين الحقيقة ,,,
ولي قدااااااام,,

الاستاذ ياسين لك كل التقدير وانت دائماً ما تواصلنا برائك المستنير ,,,

اولا احيك اخ لقمان على هذا المضوع ذو الاهميه البالغه واحىكل الذين داخلو فى هذا الموضوع
نحنو كما ذكرت ليس ضد الحداثه ولا العولمه ولكننا ضد ماخلفته من ضياع لى اسمى وانبل الخصال الموروثه من زمن الجدود كالشهامه والكرم والتوادد التراحم و ووو

ونحنو ننعى ذاك الزمان ونقول معاك ياحليل ايام زمان
ااما الاشيا القديمه محفوظه فى دواخلنا ولن ننساها ابدا
ام فارس

شكراً ام فارس علي كلامك الطيب ,, واتمني ان نحافظ بقدر المستطاع علي قيمنا وتقاليدنا السمحة ,,

ياحليل زمن زمان و ايام زمان ...........و زمن ولى و راح في كثير من اشكاله و بنت لنا الالفيه الرقميه عالما واسع في شتى الاشكال و التعريجات الغير منتهيه اللتي ما كان لناس زمان منها شي .وجوهر زمــــــــــــــــــــــــــان زمن زمان الباسطه في الامور كلها في المعامله و العيشه و بساطه في الروح وكل الشي....وهذا نفتقده و ايضا بعض العادات الثمينه و الثقافات الجميله و الاخلاق العاليه و القيم الجوهريه و كثير مما بحمله ناس زمان,هيا لنقرس القليل مما يماشي و يلائم شباب اليوم جيل المعلومات الرقميه ..........ومن العادات اللتي لا اعرف لها منشا اليوم سوى البعد عن زمن زمان زمن المحنه زمن الناس الثقال و ها نحن اليوم خفاف كلنا استخفاف .تاخير في المواعيد و عشوائه التصرف و البزيغ في الشارع و....الخ. اقراء موضوع ماذا تفل لو ما كنت سودانيا ......................................................

أن اختلاف الزمان والمكان يفيد الاختلاف في تجديد الواقع , فحيثما اختلفت الوقائع واختلفت مآلاتها



ولك جزيل الشكر الاخ لقمان

والله ياسمير كلامك بالحيل سمح ,,, وياريت كلنا نستفيد منو ,,, لك فائق الشكر والتقدير ,,, ولي قداااااااااااااااااام ..