رسائل ست الدار بت احمد جابر للزين ود حامد من كلمات الشاعر محمد الحسن سالم حميد ... اتمنا ان تحوذ رضاكم و سوفا اقوم بتنزيلها علي اجزي نسبة لطولها و هذا هو الجزء الاول....ـ جواب أول ـ باسم الحاضر و المستقبل.. ست الدار بت احمد قالت.. ليك يا الزين ود حامد شوقنا ..اما بعد......... المبعوتة المنك .. وصلت ... ورح فكيت الطلب الفوقنا ... باقي الدين يا الزين خلصتو ... قدر الفاضل .. مصروف راشد و التومات ... والجايات من جاي .. لا جاي ... زي ما قت لك قبال ده ... شهر اتنين حا نطهر راشد ... شهر اتنين المدرسة تاجز ... الله يبعد العارضي تجينا ... و راشد حالف ما يطهر ... إلا ابوهو و عمتو تحضر ... وإلا يجيبو الغنايين ... شان الشوق بت سرنا ترقص ... قلنا نجيب المداحين ... طنطن.. انا جاي من الحج ... وعارف راشد لما يطنطن... كل الدنيا الفيي تطنطن ... غايتو بشر .. بس ريو يهون ... ما كلمتك بالتومات ... أول البارح جني يرطنن ... قالن نحنا الخواجات ... بسم الله .. مرق حصلت ... لقيت لك جعفر زارد البيت بالخواجات ... يبقي حداشر و خواجية ... ناس البلد الكسرو عليهن ... صدو يقلبو في إيديهن ... عدمانين من إسم حكيم ... ولا خبيرآ للمشروع ... علماء آثار .. فضلت في اثار ... ما خموها الجونا قبلكن ... شن خلولنا بلا حجار ... الله يصرف الخواجات... بينات جعفر و المحجوب ... و المحجوب و الخواجات ... طقت حجي .. العمدة طقاها ... باقي الناس الجات للفرجي ... .. قنبو قيلو شبعو لحوم ... و الخواجة يصور ساكت ... ستة خرفن و تيس ما كفن ...ستة خرفن في فد يوم ...المعدوم اشكال وألوان ... اي خدار في اليوم داك في ... كملن رف كمين دكان ... أول كفو الخواجات ... بعدو العمدة و صمدالساقية ... ناس المجلس و المشروع ... بعدو الطلبة و باقيالناس ... حتي الشفع و الحروم ... ستة خرفن وتيس إنصفن ... ستة خرفن في فد يوم........وليكوم اجمل التحاية ...محمد احمد بابكر ... ملبون ...
