غيب وتعال

الاخوة رواد المنتدي
عميق احترامي
غبت عنكم لفترة طويلة ورجعت وللاسف لا جديد المنتدي بعيد جداً عن هدفه الاساسي ونحن بعيدون عن منتدانا وعن هموم قريتنا وكل شئ من حولنا يسير نحو الحضيض بخطي واثقة ولا محفز للرجوع للمنتدي ولا للجلوس للتفاكر في هموم قريتنا
حالة تدعو للحزن والياس

سروره احسن زوله....كيقنك انتي؟ عساك طيبه و مبسوطه ؟؟
والله كلنا غبنا و رجعنا و الحال ياهو ذاتو الحال وفي جواي مافي شئ....علشان كده يا اختي اقعدي في الواطه و كوني انتي المبتداء و الجميع سيكون الخبر ولو كل واحد انتظر علشان التاني يبداء ما اظن تكون في بدايه...وقع ليك؟؟؟

الريح يا اخوي
انت عامل شنو ؟؟
المشكلة الوحيدة في الدنيا دي انو انا واقع لي ، وواقع لي تماماً ، المغتربين خارج الوطن في وادي والناس الجوة الحلة في وادي والمغتربين داخل الوطن في وادي والمنتدي كلو اخبار ما بتخص القرية لا من بعيد ولا من قريب عندنا مشاكل دايرين ليها حل ومافي زول عايز يعمل حاجة الناس بتجي وتدخل المنتدي عشان حاجات لا بتنفع المنتدي ولا بتنفع الحلة في شئ والشمس كل بتشرق بس لا جديد لا جديد لا جديد

سارة
موضوعك يحتاج لورشة عمل ولجان تنمية وما تخافي من الكلام ده لأنو ورشة العمل ممكن تكون من أعضاء المنتدي والحادبين ورجال الخير وما أكثرهم في السديرة وخارج السديرة ويتم تقسيمهم حسب تخصصاتهم، وأنا بتكلم عن ورشة عمل حقيقية وبرغبة واضحة من الجميع لإنجاح الورشة والخروج من النقاشات والمحاور المستفيضة ببرنامج عملي يطور عملها أكثر واكثر ويزيده شمولية وعمقاً لفهم متطلبات تطوير السديرة (الحلة) وتحديد الاحتياجات التنموية الأساسية ـ واستكشاف واستعمال مداخل مناسبة للمجتمع ـ وكسب الثقة ـ وتحديد وتحليل وحلّ المخاطر المتوقعة وتحديد وتحليل وتقوية العوامل الداعمة ـ تقييم الوضع الحالي ـ تحديد احتياجات المواطنين واهتماماتهم ورغباتهم وطموحهم وتحقيقها، والارتقاء بنوعية الإنسان وأنماط حياته من خلال التنمية الاجتماعية الثقافية ـ العلاقات الإنسانية ـ ونظام التكافل ـ الاستغلال الامثل للوقت - مهارات التواصل ـ العمل الجماعي، وتحديد ادوار المؤسسات المحلية الاخرى من : مدارس ـ وارشاد زراعي والمساجد والخلاوى ـ والسوق ـ والقطاع الخاص ـ المغتربين ـ مثقفي القرية ـ والخبراء وغايتو أنا ما شايف الحكاية دي صعبة لو الناس قعدت وإتفقت على شئ فيه نهضة وتقدم السديرة.
ودمتي بود .

نبيل نهارك طيب

ما دايرة احبطك واقول ليك انت طموح زيادة ........بس بي خبرتي الطويلة مع اهلي ناس السديرة ديل البتقول فيهو عشرة سنة لي قدام ما ببقي ، نحن بنطلب من الفئات المتعلمة المثقفة المامحتاجة لي توضيح وشرح وهم حتماً فئات متضررة من كل جرح يمس القرية ، لكن مافي اي استجابة ، انا ابصم بالعشرة انو سمعو كلامك دا يقولو عليك جني مقرضم ومفلهم سااااااااااكت ..

والمنتدي اصبح مثل الشيخ المريض ممكن ان يموت في اي لحظة
كلامك في محلو والله

ياجماعة السلام عليكم...اقبلوني بالعرض كده اولا التحية لكم جميعا...الاخت سارة صاحبة الموضوع والاخ الريح العريس وبقية الاخوه..في الحقيقة انا بالذات طال غيابي شديدددددددددد عنكم وعن المنتدي اتمني يكون الجميع بخير..
والبغيب زيي كده افتكر ماعندو حق يعترض علي سير المنتدي لان فاقد الشي لايعطيه..افتكر نحنا اهل المنتدي غائبين وبالتالي ماعلينا الا نقول للناس المواصلة والمشاركة اعانكم الله ووفكم..وويجب علينا ان نشد من ازرهم ولو من بعيد..عشان كده يا عزيزتي ساره الحق علينا جميعا في التقصير لذلك نتمني ان نسهم بكل مانملك في دفع المنتدي لقدام والمثل الانجليزي بقول..some thing better than nothing شي افضل من لاشي..نتمني ان تعود الحيويه مرة اخري لمنتدانا ونردد ونقول غيب وتعال تلقانا نحنا حلوين ..
مع عاطر الامنيات..

الاخت العزيزة سارة لكي التحية

غيب وتعال تلقانا تاني نفس الايادي الراجفه مشتاقة في ساعة



سلامك غيب وتعال الدايمه غيب وتعال تلقانا بي نفس القلو الياما

والله الموضوع



ذي العسل

والله ياسارا عاوز اعرف عنك اخبار ؟
اخر خبربعرفو انك كنتي مفوقه من سادس الى اولى متوسط ؟
ارجو ان تقبلي ردي مع انه جاء متاخر ومتاخر جدا جدا
اما بخصوص طرحك كلنا همنا الوطن والوطن الاصغر خاصة عندما يكون هذا الوطن السديرة وبس والسديرة الشرقية ...........................
اشكرك جدا