سفرى معاك

سايقانى لسه الدنيا فيك
راميانى فى بحرك غريق
ماليا غير سفرا معاك .. مابيه القعاد انا بى وراك
وكيف استطيع العيش بلاك
يانى منك****** يانى ليك

اغزل ضياك وانسج سناك واذوب خضوع فى حضرتك

واتشابا لى سفنك شراع
وارويك حنان ودفا وامان وابقى الشمس لى دنيتك
وافضل اعيد فى غنيتك
*****
ياحلو المعانى الفى غناى
يادوزنة حبى ورجاى
ياضى كسر حاجز ظلامى
ويانجم رصع سماى
ياخشوعى.... ..
ياخضوعى ..
وياقصايدى ....
وياحجاى..
بلقى فيك اجمل وشيش داعب رؤاى
تنضح ملامحك بالسماحه
وتبقى لى فى تعبى راحه
ولى ضياق دنياى براحا
وليا فى الغربة الاهل والصحبه والجار والصديق
وفى دروب سفرى الرفيق
وفى دياجى الليل شعاى ولى فصول عمرى الربيع
بتبقى لى ياحبى ليل
وتبقى لى فى عطشى نيل
ولى عناوينى الدليل
وفى حماماتى الهديل
ولى نهاياتى الرحيل
وانشاء الله ياست البنات تتهنى بالذين والعديل
ماتضوقى يوم طعم المرارة
وتضج حياتك بالبشاشات والبشارة
وتنولى كل الفى مناك
اميرة فى قلبى الهواك
وماعشق فى يوم سواك

كلمات رائعة وجميلة فقط اعتقد لاصحاب الذوق الرفيع والحس المرهف..
لك اجمل تحياتي واروع امانيي ياعسيلاتي ياراقي.