قرات للاخ محمد احمد صالح ابو عمار وهو يذكر استاذ السني بانجازات السديرة في مجال الرياضة وهو يشير للكاس الذي احرزته السديرة الشرقية في دورة الصداقة وكنا وقتها والله العظيم (شفع ) صغااااروالدليل علي ذلك كان مابركبونا في العربات بنمشي كداري من السديرة الي كاب الجداد، وطبعا هذه الدورة كانت السديرة فيها البرازيل بس وانتصرت في جميع المباريات ولم تخسر الا مباراة واحدة من ابناء عمومتنا ناس الغربية طبعا كلكم عارفين ليه خسرنا لان ناس الغربية ادوا ناس الشرقية برتكان (برتقال) محقون بمحاية بمعني انو ناس الغربية (مكجرين )المباراة والزول المكجرة هو فكي جبريل من فلاتة الغربية،وناس الشرقية كان بغلبوا دائما وفي نهاية المبارة بعملوا شكلة يعني مكاشيف حال وفي اعضاء دائمين كان بدخلوا الحراسة(شرطة كاب الجداد) طبعا ده راجع لوطنيتهم وحماسهم الزائد عن اللزوم ومن اشهر هؤلاء الاخ العريس محمد احمد مساعد((داؤود)) كا صديق دائم لناس الشرطة يدخل الحراسة من بداية المبارة ويطلق صراحه بعد نهاية المباراة مباشرة، نرجع لمباراة الغربية بتاعة الكجور وفيها ناس كتيرين دخلوا الحراسة اتذكر منهم داؤود طبعا والاخ برهان العوض، وقبيل انا قلت ليكم كنا شفع مابركبونا في يوم المبارة ديك والله العظيم مشينا كاب الجداد الساعة 12 ظهر واتذكر تماما معي الاخوة الاعزاء جدا عبد القادر احمد صالح وقرشي مختار وعبد المطلب محمد صالح وحاتم مختاروحارث حمد ولما وصلنا المكتب جا ماري فوقنا الباشمفتش قال ماشين وين؟ قلنا ليه الكورة ، قال يا اولادي في كورة هسي؟؟ اركبوا اركبوا، ووصلناكاب الجداد ومشينا الفرن واشترينا الرغيف والبلح وقرضنا رغيفنا داك وانتظرنا حتي مواعيد المبارة، ونحنا ماعارفين المباراة مكجرة المهم بعد ان خسرنا المباراة 1/3 وجاب القون طبعا هداف الدورة ويس حسن احمد، الجماعة اكتشفوا الفكي جبريل واصبح هتافانا جبريل ظلمو.... جبريل ظلمو ، يعني ما ادوه حقو، وياخي انشاء الله يكون ما ادوه لي هسي، المهم في الوقت داك نحنا ماعارفين صحة الكجور ده من عدمو، وانا عمري ماتعاملت مع ناس الكجور بس مرة كنت( متواطئ ) مع ناس فريقنا ،بالرغم من انو مامقتنع ، كانت في دورة في السديرة واخوكم ده كان عندو فريق اسمو( العمالقة ) وكنت الكابتن ليس بحكم اني اقدم لاعب ولا العب واحد بس كنت متلقي حجج ، والفريق ده كان يضم اصدقاء وكلهم ما بعرفوا يلعبوا، الا من رحم ربي بس مابوريكم منو الكان فينا لعاب شديد ، وفريقنا جا الطيش وكان يضم شخصي متلقي الحجج وعبد القادر احمد صالح ومحمد احمد الامين(ود الشام) ومحمد احمد الشيخ وانس عبد الملك وحارث حمد وعلي ما اعتقد ابراهيم العبد، المهم فريقنا كان كل مباراة بياخد 3 و4 قينان وفي اتنين مننا (طبعا مابصح اذكر اسمهم ) لكن في واحد منهم اسمه مذكور هنا(انا مابفسر وانت ماتقصر) المهم الجماعة ديل قرروا يكجروا مباراة لنا وهي مهمة جدا ( والله انا مافيهم )، ومشوا طبعا لواحد (دجال) في مكان ما ، الكلام ده في نفس يوم المباراة وبعد مار جعوا قلنا ليهم انشاء الله خير، قالوا : قالينا ح تغلبوا 3/ صفر، ده كلامهم والله ،طبعا اخد منهم قروش بس الحمد لله ماقال ليهم جيبو عتوت ابيض ولا ديك ملون ( انا ياجماعة والله ميت من الضحك زيكم)، تخيلوا بعد قريشاتنا الدفعناهم ديل، كم كانت النتيجة؟؟ والله اتهزمنا 6 / صفر، وبرضو تقولوا لي جبريل ظلمو؟؟
:P :P