الليله انا قاعد زهجان وقرفان ووالله مابموت براي بي زهجي دا.
يعني اطرشق براي..... حلاتكم
احسن ليكم تعالوا واسمعوني قبال ما اجر ليكم عكازي المضبب دا واجيكم مارق برة تعالوا اقعدوا فوق البنابر دي واسمعوني كويس وفتحوا اضنينكم واوعي من الكلام التحت تحت اسكتو عشان ابدأ ليكم
يلااااااااااااااااا
في حلتنا في بداية الثمانينات كانت تكثر مسألة مرتادي الليل ( الحرامية ) وكل يوم نسمع ناس فلان الحرامي نط عليهم وفلان داك الحرامي اداهو بنية عور عينو .... وآدم الغسال في ا لصباح لقوه مضبوح..... الخ
اها ياسيدي الآمانتي ليك يوم الخميس كدا ناس امي قرروا يمشوا يبيتوا عند حبوبتي وقالوا لي انا احرس البيت.
امي قالت لي تبيت براك في البيت ولابتخاف
قلت ليها بكل ثقة اخاف من شنو كمان ومعاها صرة وش نظام السؤأل دا يعني غايظني شديد لاني رايت فيهو الاستفزاز لانو قدام اخواتي
المهم في الامر الجماعة ركبوا العربية ومشوا ، لحدي هنا كويس
بعد ما الواطة ليلت وخاتي السرير في نص الحوش كل مرة اسمع صوت الرياح في شجرة الليمون اقوم اقعد في نص السرير واتلفت في الحوش ومرات اسمع صوت الملاية مع الهواء تعمل فررررررر ومرات تعمل طقققققققققق (شلتها لفيتها تحت المرتبة )
وتاني اسمع صوت فحيح جريد النخلة بصوت عالي يطير من عيني النوم
وقلبي يسوي
تج
تج
تج
بقيت اتخيل منظر آدم الغسال اللقوه مضبوح جنب دكانو بصراااااحة النوم طارلي كلوكلو
بقيت افكر ياربي امشي لي صاحبي ايمن عشان يجي ينوم معاي ؟؟؟؟
تاني اتخيل منظر خالتو سعاد ( ام ايمن ) واقول لالا شماراتها بكرة الصباح عند بتاع الخضار وتفضحني عدييييييل اهـ اقبل وين وامشي وين !!!!
قلت في نفسي والله كان الحرامي ضبحني ماانادي الزفت دا.
المهم فكرت كدا قمت جبت لي حجارة وطوب وحصحاص ختيتها جنب سريري كلما اسمع لي صوت ولاكشكشة تخوفني اقوم اردم ليك بيوت الجيران من كل الاتجاهات بالحجارة.
واول مااسمعهم ليك صحوا وولعوا الانوار اطمئن شوية واضحك لي ضحكة خبيثة لما اسمع صوت خالتو سعاد تقول ياناس الحلة الحقوووووووونا الحراااااامي
وبعد الموضوع دا وبي يوم ناس امي وصلوا العصر .... خالتو سعاد وحريم الحلة اتلموا عندنا وهاك ياشمارات وانا قاعد اسمع في كلامن
خالتو سعاد اصلا مابطيقا مرة جنها شمارات وكضب
كانت شافتني واقف براي في المحطة تجي تقول لامي لقيت ولدك في المحطة يشاغل في البنات
مرة شافتني قاعد في المصطبة ولعت لي سجارة برنجي برضو كلمت امي .
المهم مرة غير قالوا وقلنا ماعندها شئ
نرجع لي موضوعنا
خالتو سعاد فكت لي امي قنبلة قالت ليها اولا بالتبادي ياختي الجانا بالليل دا ماحرامي ديل عصااااابة عديل
كان قلت ليك اكتر من 15 حرامي صدقيني لانو بيتنا ردموه بالطوب وبيت عم عثمان وبيت ناس بت المنا حتي المربوع الجبنا فلقوهم بالطوب؟؟!!
وتاني قالت ليها والله انا شافني الحرامي وفلعني بي ماسورة وقعت جنب سريري
ومن الحادثة دي ايقنت تماما انو خالتو سعاد دي كضابة كضب
امي سألتني وانت اوعي تكون مانمت بالليل
قلت ليها الغريبة ماسمعت اي شئ !!!
والي اللقاء مع حرامي تاني آآآآآقصد موضوع تاني
ابوطلعت ،،،