الجزء الثاني من جواب اول للشاعر محمد الحسن سالم حميد....ستة خرفن وتيس إنصفن... ست خرفن في فد يوم... جات من صالح بت كلتوم... تسكت تخبز طول اليوم ...لمن حرقت الدولاب ...قنبت المسكينة تدعي ... الله يصرف الخواجات ... غاية الليلة الشقا يشولق ... واطات الله دي ست رشاها ... ما في غنوتآ ما غناها ... ما في مدحتآ ما سواها ... حمارو صبح لحق أمات طه ...سب الدين و الامريكان ... جنس بدع ... زولك ده يحير ... عند الجد كان أده ينقنق ... عند الفارغة يشيل ويبعزق ... .. إذكرت كلامك ليا ... إنو في ناس لاعبين بالدين ... و ناس لاعبابا الأمريكان ... الله يصرف الأمريكان ... الله يصرف الصرفيكان ... ما خلوني نشدتك منك ... كيفن حالك والخرتوم ... كيف المصنع و العمال... حالم لسع نفس الحال؟ ... ما رقوك سووك باشكاتب؟ ... يورينا الله زيادة الراتب ... كيف الناس و الحالة عموم ؟ ...و العزابة الكحيانين ... سيد البيت عل ما زكاكم ... لسع تقعو تقومو براكم؟ ... قلبي معاكم ... ربي يخدر عود ضرعاتكم ... بالي معاك يا الزين ود حامد ... بالي هناك و الشوق الشوق ... خلي شدير الجوف محروق ... راجي مطيرة الزين ود حامد ... نحنا نصاحآ زي واطاتنا ... نحنا نصاح إلا القراص و التجار ... و الحاصل البحصل كل صباح ... شتلاتك قبضن ... الحملان كبرن بلحيل ... العضمين الروكة إنزرعن ... اوعك تشفق من تالانا ... و لا نبقالك مشغولية ... زيك واحد مستورين ... و ما ناسين المسئولية ... هي يا الزين زغرد ... بت ام زين جابت لها بت ... ستة أولاد حتان البت ... المحجوب ينشد من خبرك ... شافعو محسب من يومين ...التومات طيبات و نصاح ... إلا غباش بلحيل آ الزين ... راشد كرر .. شهر اتنين ... كان ما جيت أنا ما بطهر ... الله يبعد اعارضي تعال ...كان فد دور يدوك تعال ... كان بالخصم إن شاء الله تعال ... و ما تتوصي .. وداعة الله ... أوعي البشغل و العربات ... و الحيكومة السمها فاير ....... أم أولادك ست الدار بت احمد جابر.......محمد احمد بابكر .. ملبون..