(نحن أهلنا الكبار ورونا الأعور ما نقول ليه أعور، نقول كريم عين. و الحرامي ما نقول ليه حرامي نقول همباتي – مهجري، وما بنقول فلان شحاد نقول فلان متعشم. وبالتالي نقيس على هذه الألفاظ كل شئ وذكر ان المجتمع البدوي في البطانة موزع لوزارات وهو مسئول عن وزارة الدفاع – التي تدافع عن كل بدوي سواء في الشرق أو الغرب أو الشمال والجنوب. ثم أبدى حسرته عن ما قدمته الفرقة الكوميدية المعروفة التي قدمته هو كبدوي بصورة المهانة – الدناءة – الفقر – الجهل)
رسالة بليغة من أهل العوض مخصوصة للإبن الظريف ود المدن ود موسي
بدور رد السؤال لو باللغة المهموسة فينا نقيصة ولا الصورة جات معكوسة ؟
******
ما جبتا الفتنة تعلن حرب بى جاسوسة والسبب الفنيلةالقلت في الوسخ مدسوسة
نحن نفوسنا في بحور العفاف مغموسة مية غمسة لاعار لا دنس لا سوسة
*******
نحنا أهل العوض والعزة ما بنكوسا أصحاب سمته وأصحاب فرسةً موروثة
نحنا أنعامنا بتعاف ترتع المعفوسة ونحن جدودنا عادي بطيعوا الجاموسة
*****
إيانا أهل العوض أهل النحاس أب رنّة أهل البَدر ة والمهيوب وأهل الشنّة أهل عزة وأهل سمتة وعروض ومحنة ناس البادية ناساً عشرتن تتمنى
******
نحن أهل العوض وحافظين عهود ما خناّ وللجار و العشير بالشينه ما تعجلنا
بيوتنا مسيد ضيوف زمن العدم ما بَخَلْنَا وما بصح الوليد في أعرافنا يجاهلنا
*****
ونحنا أهل العوض والله لاتقينا ولا تبدلنا واثبين كالأسود من واجبة ما اتماهنا
في البر في البحرتلقانا وين ما كنّا في قمم الرجال كذب البمِس لى حصونّا
******
ونحنا أهل العوض في الحالي و الفات كنا قج شرك الكلا م في سيرنا ما بعطلنا
بس بوعيك أكان دقس في أصولنا ومتجاهلنا نحسب في الجدود ستين ومن غير إنََّ
*****
ونحنا ربّونا الشياب فوق ماما ماتعجنا حافظين لسان حافظين كرامة أهلنا
أشبال من أسود في ضبعة ما تهجنا سايرين سير كرام لامن نلاقي اجلنا
*****
ونحنا ذاتنا يا ود موسي ما بواخذونا بي بنولـِّد و الـما عندو رأي حقو يتبع ويقلد
لو ما مخـّك المخمور وحسك المتبلد جامعة موسكو ما جابت دكاترة تولد ! ؟
*****
ما راعيت شعور الناس شعورك فاترة بتسيء للعزار أهل السيوف الباترة
أَمَانةً تَدخنك شطة ودموعك قاطرة ما سمعت بالولادة أتخصصولا دكاترة !؟
******
نحن والله عرب وأولاد عرب لينا الشرف والعز بنسرح بالرزق نحلب نصـُر ونجز
ويوم الحارة والعركة السلاح أب رز ثابتين كالجبال الشامخة ما بنفز
*****
المخسوفة والمرقوعة ياها لباسنا المجلوبة والمقنية من ميراثنا
الجار والعشير من الكتف لى راسنا في المال والعروض تخشى الملوك من باسنا
*****
ليه يا ود موسى بتذم الرجال بالعايلة ما بعشّوا الضيوف تحت السحابة الشايلة ؟
ما سمعت في أم همج كاكوم عقيد الزايلة ؟ ما سمعت بالنمر حرق الخديوي القايلة ؟
*****
لكن لسانك فك يا إبني أصلو مابتستامن تشحن في النفوس من الغبينة مُداماً
بس سمة المن مثالك في البحر بترامن العربي إن رقص ألبل قرونن قامن
******
دحين ياخي رغم الغطرسة بالتمثيل وحبة كاشك تلقى أصفارنا أكبر من مساحة داشك
شبعانين طحين من الفطير ودراشك أخير تبعد بخاف من شوكنا يخرب شاشك
*****
ومهما زعمت من عزة ونفخ فشفاشك أعلم طينّا أنصح من تراب خشخاشك
شوف ليك ناس رخاس تاخد عليهم فاشك أول غلطة كان تنيتا بنعل خاشك
*****
دحين ياخي اولاد عرب والغير عرب كلهم أخوانك إحذر واكترث شكل قوافي لسانك
والرمي فوق الجماعة بالتعابير خانك في نص البحر بتدور تقج صيوانك ! ؟
*****
نحنا نضافنا يا ود موسي مو صابون نحنا نضافنا فى عروض وشرف مصيون
نحنا نضاف ضراع بالدكري المسنون طيبين عُشرة ولكن للخصم طاعون
*****
نحنا سماحنا يا ود موسي مو كريمات ولمعة لون نحنا ولدنا عاشميق عكس للعرجون
نحنا ناس لينا أعراض بيحكمن قانون سماحة الزول يفرّج كربة الممحون
*****
نحنا دفعنا يا ود موسي ما جركان ونحنا ما بندفع الجبنة وحليب الكان
ونحنا دفعنا فى النوق أمات سناماً بان نحنا ضربنا للعوق انفجار بركان
*****
وكان كلمنا يا ود موسي بنقول الكلام حقاني وكان غنينا بنخت الشعر فى معاني
عزيزين فى النسب من ذلة مابنعاني نحسب فى الجدود ستين ومن غير عاني
*****
دحين يا غبار الكبرياء المن المعالم حاجب أحذر منّوا لا ينسيك حقوق الواجب
ومن أمثال تراثنا الفي العرف والواجب مهما العين تطول مابتعلى فوق الحاجب
*****
وعشان ما نغلط معاك ونشيل النقط من شينك أوعى تعضعض الناس البوضحوا شينك
هسع وقعت في الحلة ووجب تكشينك شن ودّاك لشعراء البطانة تشينك
*****
دحين ياخي الطامع في كثيرة الغير قليلتو تضيع وسيد بيت القزاز ما ببدأ بالجديع
بولاد الحديد القاسي في القطيع العربي إن حرن وسط المحاص مابطيع
******
نحن والله لا بنخاف لا بنعاف ولا بنتهدد لا بنكل ولا بنمل ولا بنتردد
كمان للزول البخون عُشرتنا ما بنتودد نبقالو البلا في كل فِجَة مَمَدَّد
****
رسالة بليغة لشاعر البطانة / يوسف القسم الشوبلي
عدل سابقا من قبل Samir AlSoNi في الثلاثاء أبريل 29, 2008 3:55 am عدل 1 مرات