راكوبة السديره

سلام يا شباب المنتدي
انا عندي ليكم فكره انشاء راكوبة منتدي السديره
نتونس ونتحاكي فيها
عشان نحس بي طعم السديره ونذوق شاي المغربيه وقهوة نصة نهاريه
نتونس فيها بي مزاااااج كل يحكي هو اللي عاوزه
ولي قدام
ونلتقي

اها هسا نتونس علطول و لا نرجا الناس لمن يقولوا رايهم بنعم او لا ؟؟؟؟؟؟؟؟؟؟؟؟؟!!!!!!!!!!!!
انا شسخياً حلوة شخصيا دي ...........
سوف اتونس واتونس وافطفط وانطط حتى تقولوا رايكم ؟.
حكاية القهوة بتبداء بشيل ربع رطل سكر ونص وقية بن من دكان جدنا الجيلي وتبقى اللمه عند ناس قسايا بمناسبة وبدون مناسبة والمناسبة اللمة الجميلة ....... وهنا اذكر بعض المناسبات طهور الاولاد تمهيد لعرس جائي او زريعه او كبجنة ((حلو مر)), نفاس ,اعادة مريض و( تصبيحة) (( كل المناسبات ))يعني نصبح ناس فلان جلسة قهوة .......

هههه حلوة الفكرة دي

يعني نظام نعمل منتدى معين نسميه راكوبة السديرة والواحد ياخذ فيه راحته مش ده قصدك

فهتك فهمتك يعني قسم جديد داخل المنتدى باسم راكوبة السديرة .. فوك الفكرة حلوة جاري تنفيذها

امس ما سمعت الونسة انا والريح بعد ما عرف انو انا بسمع اغاني شفع الزمن دا ....... قال ليا والله خرفت فوق اغاني الشفع انت هسا عاوز تكبرني قبل يومي طفولة شنو يا ود الزين خلينا في الايام دي مع مناطلين واقعه وحلاقة بالجنبات وكدا

الفكرة رائعة جدا وانا بدوري زكان كنت بجي كع قرشي وعبد القادر ومرات بتمشي نعوم في الكنار
نواصل

اها نتونس

جاء حرامي نهارا جهارا سرق الشرموط( الشرموط ياولاد الخرطوم لحم يجفف ويطحن ويستخدم مع الويكة في الغالب)
فجادت قريحتها بالقصيدة دي:ــــ
ابقن عشرة ياالبنوت
ابقن عشره وقفلن البيوت
شيل التلقزيون مرفوض
وقالوا السرقه للشرموط
النعمه قالت منشفاهو
وللسحانة مجهزاهو
وشكيت على ربي الجاهو
وانا ليهو ما عافيهو
دا لحقوا ملاح غداهو
انشاء الله يوقد نار في حشاهو
ام مازن مرةً تقيه
قالت شال مصاريفن شويه
واريتو المطبقه خلاها ليا
انشا الله مايعود الجيه
واللايماهو دي علويه
قالت نص الخاتم ما خلاها ليا
وام ايه الكريم حامداهو
ما خبر الداخروهو
رب العزه لي منو حماهو
وراح ناس رفيده فرتك الهديه
قال دايرلو ويكه شويه
وبصله عاد تكون مقليه
عشان يظبط التقليه

فكرة جميلة جدا ونرجو من الاعضاء التنفيذومنها نكمل الونسة

مشكور يا عاشق الديار

ربع رطل سكر و1/2 وقية بن هي اغراض لزيارة مرة قرشي ومعاودتها بعد الولادة وفيها تتم مفابلة كل نسوان الفريق وتنافل الاخبار وتوضيح بعض المسائل لو كانت فكرة صندوق او الختة او سفرة مجاملة الى احد القري المجاورة او البعيدة ان دعا الامر وفيها يتم معاقبة الشفع على عدم لحس الفنجان من السكر الملصق في قعرو ولجوطة التي هي احد كيف الجنة اساسا كما قال السيد عوض دفع الله لمن كان معزوم جبنة وحس انو مافي شفع وجوطة وكدا اها ما تكيف للجبنة ولا دخلت راسو قال ليهم جيبو الشفع ديل الجوطوها كان تخش الراس ......

ههههههههههههههههههههه تسلم ياعمو وربنا اجمعنا بيك عشان نشرب جبنة ام الزبير او بنت الشيخ







لك التحية

شوقي ليك يالسديرة شوقا لابنطال ولا بتحدد..تحياتي لكل اهل السديرة اين ماحلوا واين ماقطنوا...نتمني ان تمعنا بهم قريبا الامنيات الحلوة..وفي بالنا وخاطرنا دوما يامن تربينا في جنباتها واحتضنتنا بطيبة اهلها..
بنقول معليش يا ناس المنتدي..الظروف حالت بيننا وبينكم في هذه المدة نتمني عدم الانقطاعة وابقوا عشرة علي الوصية..مازمان وصيتني ياحليل الوصية..

وماعندو قديم ماعندو جديد