ابوها كان مزواج خلاص
ناسب جميع اهل البلد
ميلادها كان عرسا كبير
هيصة وضبايح مالها حد
يوم السماية اتيتمت
حكم القدر في الام نفد
كانت شبيهه امها
في القدلة والعود اللبد
وبقت امل كل الشباب
وجمالها في بت ما اتوجد
في مرة رفه قليبا يوم
حبت قريب الشيخ حمد
واظن كمان حباها هو
سوي الضلوع لي حبو سد
كاتمين غرامن في القلوب
ولع لهيبو مابرد
خايفين يصارحو يقولو
شو مال بالدايرنو ست
خايفين عيون الناس
تشوفو والخبر يملا البلد
والحب هناك عيبا كبير
لابت تبوحبو ولاولد
في يوم ابوها ضحك كتير
برم شواربو بلا الاسد
ناداها امنة تعالي جاي
فوق البرش ربع قعد
قالتلو هوي جاياك خلاص
قليبه فر ومارقد
حاج الخضر عارفاهو داك
قالتلو ايوه ابوسند
جاني الصباح طالب ايديك
داير نسب شيخ البلد
وانا قتلو اهلا بيك تعال
يومين تلاته تكون عقد
راجلا عظيم عندو القروش
عندو الحرير راقد لبد
هو كمان كريم واخو رجال
ماعونو يوم مابرد
جرت الدموع من عينا شو
سكتت وابت تديلو رد
قام مرق خلاها فات لاسبة
لاكايس غرض
عند المغيرب تاني جاها
كدي لي محاسن الحاج سرد
داير يأثر في قليبه
لوكان تقول تديهو رد
وقتا غلب واحتار خلاص
ولع فؤادو جمر وقد
فسر سكوت البت رضا
جهزولو لما الناس عقد
والمال مخمخمو والحرير
تحت الرجول مدهو مد
يوم الصفاح والناس تجوط
بالفرحة مقلوبة البلد
امونة تبكي بكا السواد
وبشيشي قامت للمروق
في سرقة ماحسي بيها حد
كان الحبيب راقد هناك
والصدمة قاده قليبو قد
وقفت قصادو بكت كتير
لامن دمع العين جمد
قام جاها بي شوقو الكتير
وقليبو داك انهد هد
قالتلو مابي ايدي شئ
ديل ناس ابوي وابوسند
اتلملمو وسووا الكلام
وانا لارضيت لاجبتا رد
داك عندو مالا مو قليل
وابوي شاف المال سجد
اداني للراجل العجوز
المن عروقو الدم شرد
قايلني بسعد بالقروش
ولا المراح الفات ورد
لكن محال اسعد بلاك
كان السماء ينهد هد
بديك قليبي وروحي ديل
واعيش هناك صورة وجسد
اتراجعت رجعت تصد
لكن قليبه رجع رفض
مسكت دريبا مو قريب
كم بيهو بنوت ورد
قاصده البحر دايره تموت
لاعيشة لاهم لانكد
اترددت وقفت كتير
لامن قليبه خلاص صمد
شافت مسار النيل حزين
حتي النخيل حزنان خمد
وبشيش فكفكت الحرير
لازينة لاربيط عقد
مادام حياتا بقت دموع
وقليبه من زولا انفرد
قالت اخير ارتاح خلاص
ارسي وشقاي القالو حد
في لحظة موج النيل علا
وفي جوفو غابت للابد