منتديات السديرة
أنت غير مسجل لدينا . للتسجيل اضغط على زر التسجيل


منتديات السديرة
أنت غير مسجل لدينا . للتسجيل اضغط على زر التسجيل

منتديات السديرة
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتديات السديرةدخول

descriptionإلى جميع المشرفين - وإلى الإبن أبو قدير Emptyإلى جميع المشرفين - وإلى الإبن أبو قدير

more_horiz
الجمعة أبريل 11, 2008 7:57 pm موضوع: رسالة إلى الجميع

إلى الأبناء، وأخص الإبن أبو قدير،أولا شكرا على التواصل ونريد أن نعرف شيئا عن المساهمة المادية المطلوبة لضمان استمرار الموقع في العمل.
كذلك، نحن بصدد إعداد ملف خاص عن تاريخ السديرة الرياضي والإجتماعي سنتناول فيه الجميع لذلك نرجو ممن لديه معلومات أن يمدنا بها حتى نوثقها. وقد وعد الأخ محمد علي الأمين أن يقدم لنا مساهمته عن السديرة الغربية. وهذه مجرد لمحات خفيفة:
في الرياضة مثلا أول حارس مرمى كان مصطفى الأغبش وأشهرهم محمد الأمين حاو النبي، وأحرف لاعب كان ود الحاج ود المختار لكن النعيم هو أول لاعب يذهب من السديرة إلى نادي الهلال ويلعب ظهير أيمن مع أمين زكي وكوارتي وسمير صالح فهمي في الدفاع وخلفهم الصقر السوداني الأسود سبت دودو وفي الوسط حبشي وديم الصغير وفي الهجوم جكسا وشاويش وصديق محمد أحمد ويونس الله جابو أيام 4-2-4.
أصغر لاعب ينضم لمنتخب السديرة كان محمد الأمين أحمد وأكثر الناس خدمة للرياضة في السديرة هو الوالد محمد صالح.
أهم الشخصيات بلا شك هو شيخنا جميعا الوالد (حاج الحمودي) المعروف بحكمته وحنكته الذي كان أبا حقيقيا لكل أهل السديرة واجتمعوا عليه جميعا ولم يختلف عليه أحد ثم العمدة ويس الرجل المحبوب الذي فتح بيته لجميع ضيوف السديرة من معلمين ومعلمات ومسئولين. أما مفخرة القرية فهو الوالد الراحل الشيخ بشير الحضري.
أما أشهر الفنانين الذين غنوا في السديرة فكان أحمد قنديل في زواج عبد الملك الجزولي وكان في ديوان حاج عباس وعبد العزيز محمد داؤود في ديوان حاج أمحومد.
العبد ود بابكيرهوفاكهة القرية معروف بخفة ظله كممثل ومقلد وكوميديان وهذا هو سر شبابه الدائم وهذا هو سرحب الناس له. أما أكثرالناس أناقة في البنطلون والقميص فكان إبراهيم التمتام الله يرحمه والشيخ ود عمر ود البي وفي الجلابية والعمة حمد ود طلحة وأشهر المعلمين الأستاذ الصادق عجبنا وأول من أدخل الدش كان أستاذ عبد الرحمن (المسعودية) في بيت حاج الحمودي وأشهر المعلمات الأستاذة شامة عبد القادر. أول موتورسايكل فيسبا أدخله (جعفر) وكان يحضر به من المكتب إلى القرية وأشهر باشمفتش طه الجاك. أول بص كان (بص محمد مساعد) وأول لوري (هوستن) كان لوري محمد الأمين ود ابراهيم ولوري حاج عباس .. أول حادثة كانت إنقلاب لوري حاج عباس بقيادة حسن ود أم زوم (كره السواقة من يومها) وأبعد دكان كان دكان (عوض الكريم) في آخر الحلة. بداية الحلة كان بيت ناس الجزولي ونهايتها بيت ناس البخيت ود موسى وأول طبيب يتخرج من مدرسة السديرة مباشرة إلى جامعة الخرطوم الدكتور سالم أحمد عبد المجيد. الرعيل الأول من المتعلمين مجموعة العشا ود حمد وابراهيم حسين وعباس البخيت وحسن الأمين وعلي عباس وبشير أحمد بشير أما الناس الذين كانوا أذكياء ولم تساعدهم الظروف على تكملة دراستهم مالك الجزولي ودفع الله محمد الأمين ومحمد سعيد

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
الاخ هشام عبد الملك
متعت بالصحة والعاقية وانا حين ذكرت اسمك في من يوافينا بالتاريخ لم يكن اعتباطا انما لعلمى ويقينى التام انك اهلا لذلك ولا تنسى ياخى انه كان هنالك شخص من كبار واوائل الترزية الافرنجية وانه رشح من قبل الترزية لتمثيلهم ولكنه تنازل لابن من المنطقة وهو الامين ادريس وتمازل للمرحوم عثمان جاد الله ود الفكى النذير وللتصحيح ايضا ان البص هو لاحمد مساعد وان ساءقه كان الفكى والى الامام

محمد قسم السيد حمد

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
يا سلام عليك يا ابو عبد الملك ...
والله العظيم المعلومات دي تقريبا تلات ارباعا أول مره اسمع بيها مع أني كبير في السن ..لقد صمت دهرا ونطقت ذهبا... الله يديك العافيه وما تطول الغيبه..

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
شكرا يا أبو مسلم على التصحيح لكن طبعا سقط سهوا أيضا اسم (الهدي) ومعتصم بشير كأول فنان يغني في الإذاعة وأجمل أصوات الحقيبة حمراي لكن كله جاي في التقرير بس ساعدونا بالمعلومات. وياود كركاب عاوزنك تورينا أصل الإسم (كركاب) جاي من وين أما عن إبراهيم إدريس وعلي أبو حميد فالحديث سيطول مع التذكير بأن أستاذنا حسبو ستكون له صفحة خاصة

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
بلحيل علي اوريك الاسم حق كركاب جاي من وين
حسب معلوماتي أنه أبوي الحاج الله يرحمه كان بحب المديح ومن النوع البهيج عندما تذكر كلمة البريق (تصغير برق) وكان مع ذلك يسمح له بالجلوس بجوار المداح مع علمهم بأن له ثورات اثناء المديح وبتحصل كركبه شديده لو لم يكن احد بجنبه...لحدي هنا أتخيل لي وضحت الرؤيه يا ابو عبد الملك...

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
وما أتذكره عنك فى ملاعب السديرة يا أستاذ هشام فى مباراة مع أهلنا السديرة الغربية يا هشام طبقت نظرية محاورة فى ود عبدالفضيل فى اللآين على الخط ماشاء الله كانت تدل على حرفنة وذكاء وعبقرية كروية عالية وراقية
أتمنى أن تكتب اسبوعيا عن ذكرياتك بالسديرة ، لأنه جد أمس أطربتنا بهذه المعلومات الذهبية
شكر ا شكرا

ابوقدير

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
شنو النزول بالتقيل كده ؟ خليتنا مسطحين معاك.
طبعا معظم الناس هنا ماعارفة انك كنت لاعب بمنتخب السديرة ، عشان كده شائف الجماعة بدوا يجادعوك. بس ياريت تورينا مصطفي الاغبش ده منو؟ لان اولاد الاغبش اولاد عمتي.
مع تحياتي.

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
لوحة فنية رائعة من هشام عبدالملك , و طبعاً و الله انا كنت قايل هشام ده زول صغير قدرنا لكن الجماعة قالو لي انت شايل النمرة غلط, على العموم اضيف إلى اللوحة بعض من سقط سهواً و هم لا تخطئهم العين و منهم مثلاً في الجانب الرياضي المرحوم العم محمد الامين الفكي عطا المنان الذي كان شعلة رياضية , كما اضيف لشريحة المتعلمين و المثقفين الخال عبدالقادر عبدالماجد , و اللائحة طبعاً على سبيل المثال و ليس الحصر و احسب اننا نسينا الكثير.
ولا انسى باب الكرم و الجود الذي حينما يذكر يقترن بالعم ابراهيم ود العجيل الذي كتبت عنه الصحافة صفحات في وقت كانت فيه الصحافة عزيزة و غالية.
و لا انسى ان اذكر باص العشى حمد و قلبتو عند كبري البان و انا كنت فيهو (صغيرطبعاً)
و لكم تحياتي.................... بكري العبد

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
بكري شكيتك علي الله!!!!!
انت حاضر بص العشا؟ ياخ والله انت قديم قدم ...وليه ما قلت لي المده الفاتت دي كلها؟ وما تقول لي كنت راكب فوق تسطيحه؟ والله كل شي جائز لأنه في المنتدي ده أكتشفنا حاجات تمخول ويا عالم بكره حا يظهر شنو...عموما يديك العافيه عزيزي أبو لينا الكبر مو عيب العيب انك تكون متاصبي وانت عجووووووووز.......

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
يا حسبو أحرف لعيبة عطروا الميادين هم على بشيرالحضرى وودالحاج ودالمختار وعباس البخيت وهشام عبدالملك ووداللمين والمرحوم التمتام
وممكن تضيف ليهم محمد البشيرالشيخ سعد ويس حسن وناصر الأمين ادريس والضب وحسبوعلى ودبشير
وأشهر مشجع كان أبوك العوض شفته بعينى ياحسبو وقلت الكلام دا للأمين ادريس قبل شهور، قال لى العوض ابراهيم كان لاعب كورة

أبوقدير

عدل سابقا من قبل ابو قدير في الأحد أبريل 20, 2008 2:00 am عدل 2 مرات

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
الاخ هشام عبدالملك الجزولى السلام عليك . سبق ان سحبنا منك الجنسية العسيلاوية
بقرار عائلى !!! ولكن وبنأءً على كتابت هذا الموضوع الجميل وسرد جزء من تاريخ
السديرة سوف نحاول رفع الحظر عنك ونعطيك الجنسية بالتجنس وليس بالميلاد!!!!
المهم والله الموضوع شيق وجميل واناوالله اطلع علية يوميا >وماتنسى عمك
محمد صالح مسمى عبدالملك على ابوك عشان كدة انا بلومك!!!!!
ارجو منك الرد ضرورى والا سوف نتخذ قرار آخر!!!!!
أخوك/محمد أحمد صالح
قول للاخ حسبو مصطفى الاغبش (مصطفى ابراهبم اخو الطيب ودابراهيم)
كان حارس مرمى مشهور!!!!!

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
يا أبو عمار ويا بكري ود العبد ويا أبو قدير والله السديرة أكبر من أن نحصيها في كتاب ناهيك عن وريقة لكن أهم من ده كلو إنو عمنا العوض لم يكن مشجعا وإنما كان أحسن جناح يسار في القرية ولا زلت أذكر الكدارة والجوارب التي يكان يرتديها فقد كان لاعبا منتظما وعظيما ويا ما سجل أهداف.
العم محمد صالح أكبر من أن يتجاوزه أحد وأقرأ الموضوع تاني لأنك ح تعرف إنه مذكور كأفضل من خدم الرياضة في السديرة مع عمنا على الفن في الشطرالشرقي والغربي من الوطن الحبيب.
المثقفون في السديرة ليسوا هم المتعلمون فقط ولو نظرت في الأمر جيدا وتعرفت على شخصيات مثل الفكي عطا المنان وعمر ود البي وسليمان ود ناصر لوجدت قمم ثقافية شماء وهذا على سبيل المثال لا الحصر. (لا أريد ذكر الجزولي عشان ما يكون في الموضوع كوسة)
الفنانون أصحاب الأصوات الجميلة كثيرة منذ أيام حمراي وعبد الله محمد سعيد وعبد الله صالح ومحمد أحمد البدوي قائد الأسطول ثم العقد (بالمناسبة العقد صغير ننو).
لن ننسى صاحب النوبة عمنا بل أبونا بابكير وبالمناسبة أخطر اثنين لم يقدر لهما مواصلة تعليمهما وهما على أعلى مستوى من الثقافة والمعرفة محمد سعيد خالد ودفع الله محمد الأمين. وأكثرهم ذكاء كان حسين كركاب والتيجاني يوسف!!
أما أكثر لاعب ظهر نبوغه مبكرا بعد محمد الأمين أحمد كان مساعد أحمد وهذا هو اسمه الحقيقي أما أقصر لاعب فقد كان عثمان محمد علي. من جيلنا اللاعب الموهوب كان محمد المكاشفي. وقبله كان خليفة ود الحاج. سؤال الحلقة هو:
في لاعب اسمه بشير كان حريف جدا ولعب في الستينات، ما هو اسمه بالكامل؟
السؤال الثاني:
ما هي المباراة التي كان فيها حراس المرمى مصابين واضطر هدودة لأن يلعب حارس مرمى وفزنا فيها بالكأس؟
الجائزة: دعوة لزيارة دبي والإقامة ثلاثة أيام في بيت دفع الله محمد إدريس سواء رضيت بت الخرتوم أم لم ترضى!!

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
الاخوة الاعزاء لكم التحية
الاخ الريح سبب تسمية ابوك الحاج بكركاب صحيح انه فى المديح كان يكر والكر هو الصوت العالى وان اول من اطلقه عليه حسب علمى المادح حسين عندما كسروا ابدوه فى مدحة من رفاد الليل و هاش فيها حاج انجليو ابدع فيها الشيخ البشير وكان المداح هم اليشير حضزى محمد احمد عبدالله والجيلى ود حاج ابراهيم والمادح حسين على ماظن انه من التكيتة وكانت مبارزة بين احمد بشير واحمد محمد الامبين بالدرقة والسيف رحمهم الله جميعا

محمد قسم السيد حمد

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
مشكور أبو مسلم علي التنوير و الحضور المميز
لكن انا شايف أبوعبد الملك نزل نزول تقيل شديد بقي صعب ينلحق تاني دحين آ أخوي شد حيلك ومبروك عضوية التميز استحقيتا عن جداره وللأمام أبو مسلم

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
سلاااااااااااااام للجميع ، وتحية خاصة للأخ هشام الجزولي.

صراحة يصعب التعليق ، فقط أقول five star

تواضعا ساسكت، ولك ان تعلم لاي درجة سعدت بكتابتك لهذه الزاوية، وعندما بادرت بإنضمامك للمنتدى والكتابة فيه ، من يومها وانا انتظر منك مثل تلك الدرر، ورغم ذلك لم اتوقعها بتلك الروعة، لله درك ، ولابداعك ولقلمك المتفرد . صراحة يمكن ان يكون عنوان الموضوع " الدهشة " وكفى.

ملحوظة: بت الخرطوم يا ابوعبدالملك "عسيلاوية" ومرحب باي عسيلاوي واعزم على لساني والدارك دارك ودار الجميع.

تحياتي،،
أبومأب

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
العم هشام عبد الملك ...... شكرا على الموضوع الرائع
وعلى قول حسبو نزول بالتقيل ... يديك العافية .. والاعضاء الذين سبقوني بالرد ما قصروا ...
والله الموضوع عجبني وقريته اكتر من مرة مع انو معظم الناس اللي ذكرتهم ما بعرفهم
بس من كلامك حسيت اني بعرفهم وشفتهم ..
وطبعا قمت عملت فيها استاذة على الوالدة وبديت امتحنها ... واسالها عن الشخصيات اللي ذكرتها
جزء جاوبته صح زي ما انت زكرته وجزء قالت :" ده انا ما كنت حاضره" ما عارفة اذا كان صح ما حاضراهم ولا نستهم " طبعا الكبر خش فحاولت اساعدها في الاجابة
.
عموما ربنا يديك العافية على الموضوع الجميل .. ودايما اتحفنا بكتابتك عن السديرة واهلها ...
على فكرة يا عم هشام ياريت لو تخت صورتك في المنتدى ... علشان ما تبقى انت والشخصيات اللي كتبت عنها ما بعرفهم... وسامحونا على التقصير

شكرا مرة تانية ونورت المنتدى

ننتظر بوح قلمك وجميل عباراتك ونبض حرفك في البستان

ورحيق أزهارك الجميلة التي بلا شك ستعطر المكان

حللت أهلا ونزلت سهلا

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
والله مشكلة كبيرة يا مكارم إنو أنا وأحمد البخيت بقينا عمو والله نحن ما كبرنا لكن الزمن طيارة أما موضوع الصورة فاعتقد من الأنسب وضع صورة آيات البنت البكر يمكن تشوفي فيها صورتنا زمان.. وأرجو أن تجاوبي على الأسئلة التي وضعناها.. وسلامي للوالدة وممكن تكون فعلا ما حضرت لأا بصراحة كنا حاقدي شوية وأخذناهن صغار .. والله بيني وبين أم محمد 15 سنة لكن ما معترف ليها إلا بخمسة فقط وبعد شوية ح أنكر لأنه الزمن في صالحي وبدأت تكركب إن لم تكن قد كركبت فعلا!!
إلى دفع اللهمحمد إدريس
طبعا يا دفعة ده العشم. وعلى فكرة موضوع الجائزة جد .. جد .. بس الشاطر يجاوب وأنا متأكد حتى لو سألوا هدودة مش ح يتذكر المباراة كانت ضد أي فريق؟ المهم في ذلك اليوم وتحت الهجير قمنا بعد نهاية المدرسة بحمل الكأس ولفينا بيهو الحلة وأذكر المدرس كان استاذ الفاضل من المعيلق قال لينا لفوا بيهو الحلة عشان تودعوه بسبب غياب ود الحاج بداعي الإصابة وغياب مصطفى الأغبش الحارس الأساسي، لكن نحن كنا بنهتف بأننا سنحتفظ بالكأس وبعد الجولة وفي نهارا يقلي الحبة جينا عشان نخطط الميدان وننثر الرماد على الخطوط ونطلع الكراسي من النادي وعلى فكرة ميدان الكورة في ذلك الوقت كان في محل البيارة الحالية بين مدرسة البنات والنادي يحده من الشمال الشفخانة ومن الجنوب بيت العمدة ويس.. وبمناسبة الشفخانة لابد أن نذكر أشهر حكيم من خارج القرية وهو (أبو جيبين) الله يرحمه الذي كان يتولى علاج اللاعبين المصابين ومع تحياتنا لعدلان الحكيم الشاعر والأديب الرجل الودود والمحب للحياة .. واتحدى أي واحد يتذكر المباراة كانت ضد مين وأسألوا هدودة أو استعينوا بصديق؟

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
والله احمد البخيت بقى جدو عديل .... وبيفرح لما يقولوا ليه يا عمو ولا "جدو راجل حبوبة"
لانو دي ما بتكبره براه بتكبر معاه رفيقة دربه ودي اكتر حاجة بتبسطه على قول المصرين " في الهوا سوا"
اما عنك انت فانا لا اعلم غير انو الوالد لما رحب بيك في المنتدى نعتك بالعجوز ... فقلت خلاص معناها الجماعة دول دفعة واحدة
لو انت ما دفعتهم اكتب ورينا عمرك الحقيقي كم واوعى من الطاشرات لانك قلت عندك بنت كبيرة وانا رحبت بيها

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
يا مكارم اتحدى أحمد البخيت لو كان عارف عمره الحقيقي!! نحن بقولو لينا ولدوكم سنت كدي!! وأنا قالوا ولدوني سنة التخديرة!! أول حاجة أعرفي معنى التخديرة وشوفيها كانت سنة كم وبعدين ضربي حساباتك لكن (برفق) شوية!!
آيات هي البنت البكر وخلصت جامعة التقانة (محاسبة) اشتغلت شوية مع جد أبوها (حسسبو) وشوية مع البنك الاسلامي السوداني وهي معي الآن في الإمارات.
محمد دخل الجيش (هندسة التقانة) وأصيب في التدريب ثم التحق بجامعة السودان (هندسة طبية حيوية). أجمل ذكرياته في الإمارات عند ما كان في التمهيدي أن قابلته سيارة الشرطة أثناء عودته إلى المنزل وكان بها شرطي سوداني فسأله إنت سوداني فقال له نعم ثم أردف قائلا من وين فرد محمد دون أدنى تردد: من السديرة. وعند ما أخبر والدته بالأمر غضبت وقالت له لماذا لم تقل الحقيقة، فأجابها ببراءة شديدة: يمكن ما يعرف الشقلة!! محمد عسيلاوي متعصب مرتبط بالسديرة ويذهب إليها بانتظام.
عبد الملك امتحن الشهادة السنة دي وكورنجي متخصص ويريد أن يحترف كورة آخر مباراة شارك فيها كانت بين الشقلة والسديرة وفازوا فيها 1-0 وبعد أن تعرفي من فاز في المباراة تقدر تعرفي لعب مع ياتو فريق. آفاق صف سابع وإيلاف صف ثاني وهذه هي كل تفاصيل الأسرة الصغيرة.

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
ماشاء الله ياهشام و الـلـه ما نزال نطمع فى المزيد ياراقى ، حديثك مثير وذوشجون وأنا دمعتى قريبة جدا أحاول أحبسها عشان المعاى مايعرف ...... تحياتى وتقديرى لك ولكل رواد الزمن الجميل

ابوقدير

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
يا أبو قدير يا بتاع الخيل
أنت مدعو بمناسبة الدمعة القريبة لحضور كأس دبي العالمي في مارس القادم إن كان لينا عمر.. وسنقوم بعمل اللازم من تأشيرة وتذكرة وطبعا لا توجد مشكلة بعد ذلك على الإطلاق وهي دعوة جادة جدا وأعمل حسابك على كده ورتب إجازتك عشان تكون معانا خلال الفترة من 20 مارس إلى أول أبريل وسيكون تغيير كويس مع مهرجان دبي للتسوق. الدعوة جادة جدا كل ما هو مطلوب صورة الجواز قبل وقت كاف لعمل التأشيرة إن لم تكن من المسموح لهم بالدخول بدون تأشيرة مسبقة.

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
عزيزى هشام مشكور بحرارة على الدعوة كريم وابن كرام........أهم شىء تساعد بنتك ايات فى حل الألغاز التى كتبتها لها فى باب الترحيب بها واذا لم تستطيع حـلها أستعين بصديق..........وموضوع الخيل هجرته الى الشعر والمشاعر ....... ومـكـارم الـسنى مــتـحـمـسة لــزيــارة دبـــى بما أنها قدمت لنا خدمات بالمنتدى فأنـا متنازل عن الزيارة ليها هى وأخــوهـــا مــحـــمـــد
دعــواتــك بالتوفيق .....تحياتى وتقديرى

ابوقدير

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
زيارة مكارم بدعوة من آيات .. ومحمد بدعوة من محمد أما أنت فدعوتك مني أنا ومازال الباب مفتوحا ونجدد الدعوة!!

descriptionإلى جميع المشرفين - وإلى الإبن أبو قدير Emptyرد: إلى جميع المشرفين - وإلى الإبن أبو قدير

more_horiz
أخجلت تواضعى وأبهرت دواخلى ، ان شاء الله الزيارة سوف تكون فى وقت مناسب آخر
ان شاء الله ان شاء الله
تحياتى وتقديرى واحترامى المتجدد

ابوقدير
privacy_tip صلاحيات هذا المنتدى:
لاتستطيع الرد على المواضيع في هذا المنتدى
power_settings_newقم بتسجيل الدخول للرد